Repatriation flaet i on bakeken

Repatriation flaet i kontinu long wik ia wetem ol strict COVID-19 mesa.

Director blong Public Health, Len Tarivonda, i talem se i gat ol COVID-19 protocol blong folem taem ol pipol i stap travel i kambak long ol hae risk kaontri.

Hemi talem se ol repatriation flaet ia i kam long Brisbane, Australia, New Caledonia mo Auckland long New Zealand long tete.

Mr Tarivonda i talem se flaet blong Australia long Wednesday wik ia i tekem 107 repatriates.

VBTC Nius i kasem toksave long ol lokol se oli konsen se Kavman i sud stopem fastaem ol flaet blong Australia folem hae namba blong ol COVID-19 kes mo difren strain blong Delta Variant we i kontinu blong ko antap.

“Naoia mifala i putum ol kaontri we ol repatriation flaet ia i stap kam long hem long tu category,” Mr Tarivonda i talem.

“Category ia i beis long ol namba blong ol keis blong COVID-19 we oli kat.

“Sapos wan kaontri i kat ova long 10 keis per 100,000 hemia hemi hae risk. Mo sapos kes blong COVID-19 hemi no ova long 10 keis per 100,000 hemia hemi low risk.

“Long taem naoia Fiji, Papua New Guinea mo New South Wales long Australia i kat ol hae namba blong kes.”

Mr Tarivonda i talem se hemi impoten blong ol pipol we oli stap kam long hae risk ples ia i tekem stik meresin fastaem.

Hemi talem se ol frantline ofisa we oli stap dil wetem ol repatriation flaet ia tu i mas tekem stik blong COVID-19.

Mr Tarivonda i talem se Brisbane long Australia i no stap long red zone mbe ol nara ples long New South Wales mo saot Australia nao oli stap long red zone from hae namba blong COVID-19 kes.

Kavman tru long National Disaster Management Ofis i bin putum wan temporari ban blong stopem ol international flaet stat long 9 July kasem 31 July from security long taem blong Independens selebresen.