Repatriation flaet i saspen

Vanuatu bae i no tekem in ol repatriation flaet blong tri wik.

Saspensen ia National Tasfos blong COVID-19 i tekem mo i stat long namba 20 August kasem long 12 September 2021.

Director blong Public Health, Len Tarivonda, i talem se resen blong saspendem ol reptriation flaet ia hemi blong alaowem helt emergency advisory committee i wok blong strengthenem COVID-19 helt protocol from sik blong Delta Variant we i stap spread naoia long Fiji, New Zealand, Australia mo Papua New Guinea.

Mr Tarivonda i talem se saspensen ia i folem wan rikomendesen we Emergency advisory Committee i mekem i ko long National Disaster Management Ofis.

“Folem situasen blong Delta Variant ovasi, yumi wantem taetenem ap ol COVID-19 protocol blong mekem se sik ia i no kam insaed long kaontri,” Mr Tarivonda i talem.

“Hemia hemi resen from wanem yumi mas saspensem ol repatrition flaet o tu ol ship we i karem ol pipol i kam insaed long kaontri.

“So tri wik blong yumi mekem gud review, yumi taetenem ap ol protocol mo lukluk long sam eria we yumi wik long hem blong impruvum

“Mo taem i vinis yumi alaowem ol reptriation flaet long air mo ship blong save stat bakeken long 12 Septemba.”

Mr Tarivonda i talem se passenger flaet aot long ol kaontri i on nomo.

Wan seasonal wokman long New Saot Wales, Australia, Lingmal Joseph, i harem nogud from oli sud kambak long 25 August.

Mr Lingmal i talem se kontrak blong wok long Blueberry farm i vinis long 22 manis ia mo oli bin infom blong kambak long wik ia.

Mbe Mr Lingmal i talem se oli putum evri samting long hand blong Papa God nomo.

Air Vanuatu i bin putum aot notis long fesbuk pej blong olgeta se bae oli no tekem eni pasenja long brisbane, Auckland mo Noumea long period ia.

Air Vanuatu i talem se ol flaet long Vanuatu blong ko long Australia mo Zealand i stil on.

Commissioner blong Labour, Murielle Metsan Meltenoven, i talem se disisen we tasfos blong COVID-19 i kamap wetem hemi blong protektem ol pipol blong Vanuatu long sik.

Mrs Meltenoven i askem ol seasonal wokman blong patient, wet mo yusum ol saving blong olgeta long wan wise fasen.

Hemi talem se sam seasonal wokman we oli stap long New Zealand o Australia naoia, oli ko wok ovasi blong ova 1 yia.

“Disisen we National COVID-19 Taskfos i kam ap wetem hemi blong national interest,” Mrs Meltenoven i talem.

“Sapos tri wik ia pas, mo ol kes blong delta variant i kontinu blong ko antap, bae yumi adresem long diplomatic level blong sapotem ol seasonal wokman blong oli ko wok long ol nara farm blong kontinu blong wok mo mitim ol daily nid blong olgeta.”

Mr Tarivonda i talem se suspensen  ia i no stopem ol cargo blong kam insaed long kaontri.

(Visited 926 times, 1 visits today)

About The Author

You might be interested in