Repatriation i stap long plan

Labour bae i wok wetem Health blong tekem bak ol seasonal wokman.

Minista blong Internal Affairs, Honoroble Ismael Kalsakau i rispon long kwesten se boda open i anaons long July, be prioriti i ko long ol seasonal wokman.

“Taem boda i open, eni man i save ko kam nao be naoia kasem long taem ia(July), bambae Labour Dipatmen i sendem list i ko long technical health tim mo bae yumi lukluk long wea ples ol wokman ia oli kamaot long hem, risk we oli kat long sik mo save letem olgeta i kam insaed,” Minista Kalsakau i talem.

“Bambae i kat wan kwarentin we Health Advisory tim i kam antap we bae hemi no 14 dei. I posibol se yu tes tu taem ovasi vinis, yu kam tes nambatri taem i nogat, yu rilis. Yumi mas enabol ol pipol blong yumi blong taem oli karem ol mani i kam blong oli yusum evri mani long ol aelan blong olgeta.”

Lida blong Opposition, Honoroble Ralph Regenvanu i talem se repatriation i mas ko hed from i kat ova 2000 wokman long Australia mo New Zealand.

Mr Regenvanu i talem se kavman i sud yusum ol wokman blong hem blong help mekem swab test long ol pipol we oli kam ovasi.

Hemi talem se plante oli stap long haos nomo mo tekem ful salari.

“Yusum olgeta blong mekem swab tes long kwarentin mo long franlaen,” Mr Regenvanu i talem.

“Opposition i talem vinis tu wik i pas se mekem evri wan ia i kam wok long franlaen. So i nogat excuse from i kat ova 1000 public servants from hemi mein prioriti hemi blong manejem COVID.”

Mr Regenvanu i talem se plante wokman oli fesem hard taem from oli nomo wok mo oli stap yusum ap saving blong olgeta.

“Nara samting ol famili blong olgeta i stap wet blong oli kambak mo help,” Mr Regenvanu i talem.

“Kaontri tu bae i benefit sapos 2000 wokman i kambak wetem 1 point each, yumi stap tokbaot kolosap VT2.5 billion blong helpem economi long taem naoia.

“Mo yumi save se taem oli stap longtaem olsem ia i kat plante broken hom. Isu ia hemi wan human raet isu tu. Oli ol citizen blong Vanuatu mo oli kat raet blong kambak.”

Mr Regenvanu i askem fairness long taem olsem.

“Football tim blong yumi i jes ko nomo long Qatar, oli kasem COVID be kavman i stil alaoem olgeta blong kambak,” Mr Regenvanu i talem.

“Be ol 2000 wokman i stap wet long las manis vinis blong kambak.

“Antap lem yumi kat ol citizen we oli fas ovasi; i kat ol man we oli sud kam wok, ol foreign national we oli kat ol bisnis,” Mr Regenvanu i talem

Jeaman blong Public Service Commission, Simil Johnson i talem se oli save provaedem sapot be no long technikol eria.

(Visited 1737 times, 1 visits today)

About The Author

You might be interested in