Rikonstraksen blong Luganville Municipal Council haos i kohed

Luganville Municipal Council hem i unveilem long tete niufala strakja disaen blong kaonsel haos blong Luganville Municipality.

Mayor blong Luganville Municipal Council, Peter Patty, i aknolejem Vanuatu Kavman from financial sapot blong rikonstraksen blong kaonsel haos ia afta we i kasem bigfala damej long Saeklon Harold long 2020.

Mayor Patty i talem se Vanuatu Kavman hem i aloketem VT37 million blong rikonstraktem Luganville Town Hall ia.

Hem i aknowlejem donesen blong VT300,000 we Torba Provincial Kavman mo ol pipol blong Torba oli save donetem olsem respon afta long Saeklon Harold blong pem architectural disaen blong bildim niufala town hall ia.

“Mo tete wanem disaen we yumi lukim ia hem i kam tru long mani blong Torba Province,” Mayor Patty i talem.

Ona blong Shem Construction Company we i winim bid blong konstraktem kaonsel haos ia, Sandy Shem, i aknolejem Vanuatu Kavman blong save awodem konstraksen wok ia i ko long kampani blong hem.

Mr Shem i klarifaem se kontrak we hem i winim, hem i kamaot long treshol blong Central Tender Board.

Hem i talem se kampani blong hem i aplae from bid ia, hem i no kam in olsem nomo blong kasem bid ia be hem i bin aplae blong winim.

Konstraksen wok blong Luganville Municipal Council haos we i bin damej afta long Saeklon Harold i sud vinis long six manis taem.

President blong Sanma Provincial Kavman, Malmal Langi Touve, i sapotem rikonstraksen ia mo talem se kaonsel haos ia hem i stampa blong ekonomi mo divelopmen blong Luganville Town olsem noten town blong kantri ia.

Rikonstraksen wok hem i stap kohed vinis.