Rikwes blong nomo liv long flood eria

I kat rikwes blong stopem ol pipol i nomo liv long ol flooding eria.

Provincial Liason Ofisa long National Disasta Management Ofis, Philip Meto, i talem se oli reisem konsen ia long Minista blong Climate Change, Honoroble Bruno Leingkone i no longtaem.

“Mbe yumi mas faenem ol ples blong pipol i ko liv long hem o pipol i ko pem graon mo stap long ol ples we i nokat flood,”Mr Meto i talem.

“Ol eria we disasta i afektem bigwan, ating i mas kat wan legal pepa we yumi mas saenem wetem ol pipol we oli wantem liv long ol kaen ples olsem ia bae Kavman i nokat eni risponsibiliti ova long hem. Hemia i sam long ol lukluk we i stap long foret we mifala i kat plan long hem wetem sam stakeholda.

“Fulap long ol eria ia, plante pipol i mekem karen mo spendem ful laef long hem mo taem i kat flood, mifala nao i tekem blame long hem.

“Olsem wan ofisa we mi wok long dipatmen ia blong ova 12 yia, ating hemia i wan long olgeta rikwamen we ofis ia i stap mekem tru long corporate seves long Ministry blong Climate Change, tru long Minista espeseli long ol konsen blong plante pipol i stap liv long plante eria blong flood olsem Prima kasem Teouma Valley.

“Mo hemia i stap long risponsibiliti blong minista blong resem konsen ia long ol nara collegue blong hem.”

Mr Meteo i talem se hemia i wan bigfala nid blong adresem.

Komuniti blong Puniga mo Paama narasaet long Warwick, Le Lagoon, i kol long Kavman blong putum ol gudfala dreinej blong stopem flood.

Lida blong Komuniti ia, Jeffrey Karie, i talem se oli mekem plante efot long plante yia blong askem kavman i fixim gud dreinej sistem mbe i nokat samting i hapen.

Komuniti narasaet long Warwick Le lagoon hemi bin stap blong 60 yia nao mo population blong hem i araon 500.

Jif blong Teouma Valley, Jif Toka Kahipa, we komuniti blong hem tu flood i spoilem ol kakae mo haos blong ol pipol, i askem kavman blong helpem olgeta i muv aot.

Jif Kahipa i talem se evri taem oli vot mo hemi gud blong kavman i help.

 

 

 

 

 

 

(Visited 223 times, 1 visits today)

About The Author

You might be interested in