Rispektem curfew -Bisnis haos

I kat kol blong ol bisnis haos i klia long esential bisnis long taem blong 48 haoa COVID-19 curfew.

Jeaman blong Vanuatu Chamber blong Commerce mo Industry, Antoine Boudier i talem toktok ia long VBTC Nius long eli wik ia.

“Yumi stap long lokdaon sins long Satete vinis folem ol outbrek blong ol COVID-19 kes we i stap long populasen, bigfala jalenj we yumi kat long praevet sekta hemi stap long komunikesen,” Mr Boudier i talem.

“Mi fil se Kavman i mas komunikeit moa, i mas kat wan ofisa we i mas komunikeit long 9 o’klok, long midel dei mo long aftanun. Yumi long saed blong bisnis sekta yumi andastanem se i kat ol essential seves, long taem we yumi talem olsem yumi luk kolosap long Port Vila evri Hardware i open. Hemi bin klia long saed blong ol esential seves olsem ol hardware sapos i kat nid blong ol man i ko karem material oli save stap long kol sapos oli stap asistim ol kwarentin fasiliti.

“Mi sapraes se tete plante hardware long town i open mo ol man i ko stap mekem shopping olsem oli stap renovetem ol haos blong olgeta. Hemia hemi no stap long kes blong esential bisnis.

“Bae mi talem wan klasik exempol se yumi long saed blong electrikol wok, ol sto blong yumi i klos nomo i stap, mo yumi stand by long telephon. Sapos i kat nid, sapos olgeta long Unelco, sapos wan man i kat wan problem wetem electrical, wan ministry, o institution then oli kolem yumi mo yumi save aktivetem tim blong yumi we oli stap anda long operation blong COVID-19 blong ko mekem wok blong olgeta.

“Mbe i no stap minim se binis blong mi hemi wan essential seves bae mi save open doa long eni man.”  So mi tink se ol private haos i mas klia long kes blong esential bisnis.”

Director blong Policy, Planning mo Corporate long Ministry blong Health, Dr Samuel Pusikai, i talem se oli traem bes blong putum ol rul blong pipol i no muv tumas.

“Pat blong curfew we mifala i putum inples, hemi blong limitim ol non-essential seves,” Dr Pusikai i talem.

“Mo alaoem ol esential seves olsem health, yumi no naf blong stopem ol hospital from ol sikman i nidim seves ia. So sapos yu no wan esential seves, yu no nid blong muv araon blong tekem wan samting, please stap long haos. Taem yumi stap long haos i priventem spread blong virus.”

Mr Boudier i talem se hemi tink ol private sekta bisnis i mas rispektem wanem we kavman i stap putum from efate i stap traem blong stopem spread blong COVID-19.

(Visited 721 times, 1 visits today)

About The Author

You might be interested in