Saeklon Ruby blong kasem Vanuatu

Vanuatu Weta Ofis i talem se Tropicol Saeklon Ruby bae i kam insaed long eria blong Vanuatu samtaem tete.

Tropicol saeklon Ruby i stap long 16.3 saot mo 158.7 east , feta Saot blong Solomon Islands mo feta Not West blong New Caledonia.

Duty Forcaster long Meteo Dipatmen, Ellen Luke, i talem se category tu saeklon ia i stap muv i ko long New Caledonia mbe i dipen long muvmen blong hem.

“Sapos i pas bitwin Vanuatu mo New Caledonia, bae yumi ol pipol long Central mo Saot bae i kasem sam win blong hem,”Mrs Luke i talem.

“Mbe sapos i pas i ko long New Caledonia nomo, bae yumi save putum sam marine woning blong solwota nomo. I dipen long eria blong gale blong hem tu sapos i no bigwan bae i nosave afektem Central mo saot aelan blong Vanuatu.

“Yumi luk sapos i kasem 160 east(eria we yumi lukaotem) mbe yumi save putum aot weta infomesen.

“I luk se tasdei bae weta i save kam gud bakeken.”

Mrs Luke i talem se saeklon sisen nao i mekem ples i stap hot tumas.

“Taem yumi kam long saeklon sisen, plante win i kam long Not East, Not mo Not West i brigim air long equator i kam daon mekem se ples i hot,”Mrs Luke i talem.

“Long taem blong winta, yumi kat ol Saot East win i kam antap mekem se i bringim air long ples we tempereja i mo kol mo ples i kolkol.

“Wan samting abot tropikol saeklon se hemi help kolum daon tempereja. Afta long saeklon tempereja bae i kol bakeken.”

Vanuatu Weta Ofis i advaesem pipol blong stap alert mo listen oltaem long Radio mo visitim website blong Meteo Dipatmen.