Sale blong national symbol i mas kat permit

Wan compliance wok bae i hapen blong ol bisnis i mas kat permit blong yusum o salem ol National symbol.

State Flag mo Armorial Bearing Amendment loa hemi stap long proses blong Ofis blong Attorney General i gazzetem, mo Internal Affairs Ministry hemi wonem ol bisnis blong oli mas stat pem permit.

Wetem niufala loa ia, ol bisnis we oli mekem less long VT3 million long wan yia oli pem VT50,000 blong aplae from aplikesen form mo VT50,000 blong permit. Wan total blong VT100,000. Ol bisnis we oli mekem anual riten ova VT3 million bai oli pem VT100,000 long aplae mo VT100,000 blong permit hemia total VT200,000.

Compliance Manager, Ken Malalo, i talem se wetem niu loa ia hemi kivim pawa long ol ofisa blong mekem inspektion mo givim wan notis sapos man i nogat permit blong salem ol state symbol, olsem Vanuatu flag mo coat of arm.

“Yumi enkarejem ol shop owna long Sola(Vanualava), Lakatoro(Malekula), Saratamata(Ambae), Luganville(Santo), Port Vila(Efate) mo Lenakel(Tanna) blong mekem sua se oli kam long Internal Affairs blong kasem ol niu permit bifo tim i pas blong mekem inspeksen,” Mr Malalo i talemaot.

“Taem hemi kondaktem inspeksen, act hemi givim pawa blong hemi seizem ol national symbol sapos i nogat eni permit o hemi save givim penalti notis long olgeta we i nogat permit. ”

Naoia oli rikodem 98 binis we oli holem permit finis, includum ol Chinese shop mo lokol long Port Vila nomo mo Luganville. Ol handicraft bisnis man tu oli mas karem permit. Compliance bai hemi go hed long evri provins long kaontri once loa hemi gazzet long wik ia.

“Yumi kat wan form i stap, taem sapos wan apliken i wantaem salem wan national symbol hemi fulum ap mo afta yumi luk mo save givim wan permit beis long bisnis blong hem.

“Yumi priperem permit sabmitim i ko long minista, taem hemi apruvum ale yumi sabmitim long apliken.”

Ol mama we oli stap somap long ol handicraft long Port Vila i talem long VBTC Nius se oli no hapi blong pem permit fi blong VT50,000 from i sas tumas.

Oli askem kavman blong mekem vatu ia i kobak daon long VT12,000 we oli bin stap pem long hem.

 

(Visited 406 times, 1 visits today)

About The Author

You might be interested in