Sam kostol eria long North Efate i kasem woning

Pipol long Mangaliliu kasem Lelepa Landing long North Efate i kasem woning blong no swim o kakae long solwora.

Dipatmen blong Fisheries i talem se hemia i folem wan Red Tide we tim i faenem long eria blong Fatkao mo hemi poison mo no sef.

VBTC i toktok long Deputy Director blong Fisheries Dipatmen, Sompert Gereva i talem se “Ol man long ol eria ia i no sud kakae eni ded fish o even shell from oli kamaot long wan envaeronmen we i poison.”

Hemi talem se “Hemia i save kosem kil long ol man tu mo hemi impoten blong no ko kolosap from i save spoilem skin, eye mo sorae sapos oli pikim ap.”

“I kat plante opsen blong go fishing aotsaed be i no long rif from taem i gat low tide, poison ia hemi kilim plante marine laef long reef,” hemi talem.

Director Gereva i talem se” Blong mekem i klia, Red Taet hemi cos tru long alki o wanem yumi singaotem se nalumlum.”

Hemi talem se Nalumlum ia, hemi ol smolsmol laef animol we yumi nosave luk wetem own eye blong yumi, mo oli yusum oxygen olsem ol plant blong mekem ol kakae blong olgeta mo putum bak oxygen long solwora, mo sam oli kamaot long semak famili blong fish poison.

“Alki o Nalumlum hemi no stap kam antap nomo olsem, long keis ia, weta situasen nao i kosem.”

Foto ia i soem wan shell i ded from poison long Red Tide. Photo: Fisheries Dipatmen.

“Ol man i mas andastanem tu se ol aktifiti blong ol man tu long sho i kontribut blong mekem se i gat fulap nutrient long solwora we i mekem Red Tide ia,” hemi talem.

“Ol aktifiti long lan olsem ol man i sakem doti long riva mo i ko long solwora, ol man i katem daon plante tri, fidim ol animol olsem pig o buluk mo even putum toilet kolosap long riva o solwora. Mo taem ren i ren i washem aot ol doti graon ia i ko long solwora mo hemi ko stap andanit long dip solwora.

“Mo taem current i tekem ol doti ia i kam antap mo joinem ol smolsmol animol ia we hemi alki o nalumlum i mekem wanem yumi kolem se Red Tide i react quik taem mo mekem se i poison.”

Wan lokol mama long Mangalilu i talem se “ Taem mi luk ol nalumlum ia, hemi smol nomo fastaem, be nekis dei hemi spred bigwan i ko long Lelepa Landing.”

Mr Gereva i talem se hemia i folem ol quik reaction blong ol animol ia mo wan we oli kolem Dinoflagllate we i save swim fast mo mekem se tide ia i grow kwik.

Hemi talem se Red Tide hemi no kala red nomo mbe hemi save kam long eni kala olsem grin o purple mo nara moa.

“Hemi talem tu se sam lokol i faenem ol nalumlum ia tu long Sunae Vilij long Moso Aelan, mo tim i stap investiket long hem,” hemi talem.

“Wanem i stap, bae Fisheries Dipatmen i nosave stopem mo Red Tide ia i save stap blong sam manis spaos condition blong hem we i live long hem i stret mo hemi karem moa energy long hem.

“Wind nomo i save mekem blong i muv aot.”

Sam lokol i talem long VBTC se hemi sad blong luk ol kaen situasen olsem from plante oli depen long ol kakae long solwora.

Deputy Director Gereva i talem se “Long sam eria ol nalumlum ia I stap muv aot vinis, mbe mi plis long ol man blong no ko long ol reef ia fastaem bifo sam manis i pas from hemi no sef.”

“Dipatmen i no encourage ol man blong kakae fish we i poison,” hemi talem.

Fisheries Dipatmen i talem se “Oil spilej blong ol ship hemi wan nara samting mbe hemi no contribute long Red taet ia.

“Origin blong Red taet hemi veri triki mo tumas nutrient long solwora nao hemi cos blong hem, Deputy Director Gereva i talem.

“Mi askem ol pipol blong no fraet from situasen ia i bin hapen vinis long Vanuatu longtaem i kam mo no ko long reef blong tekem kakae long ol eria we i no sef.”

“Ol pipol long ol nara eria long North Efate i sef nomo be Fisheries Dipatmen i askem ol pipol blong ripotem eni saen long solwora o rif from hemi save spred kwik taem.

(Visited 1334 times, 10 visits today)

You might be interested in