Sam lokol i kwarentin long West Ambrym

Eight pipol long Craigcove, Ambrym i stap long kwarentin.

West Ambrym Area Administrator, Bong Massing, i talem se ol lokol ia i bin help blong tekem ol cargo long shoa taem Vanuatu Cargo i kasem olgeta long wiken mo taem ship i kasem Santo, tu crew i positive.

“Oli mekem tu raon blong tekem aot cargo long Satete mo oli toktok loud se oli nosave go hed from hemi plante tumas,” Mr Massing i talem.

“So ol crew i tekem i kam shoa, ale ol boy oli kam tekem mo putum long storage.

“Long Sunday oli mekem seken loading. Mo folem rabis weta, ship i mas kasem Santo. Be Mifala i bin advaesem ol boy ia blong no ko bak long haos be silip long kwarentin haos.”

Mr Massing i talem se oli no awea se ol crew ia i no bin ko tru long wan Rapid tes.

Salome Kenneth, Malampa Public Health, i talem se temporari lokdaon i stap long West Ambrym kasem Sunday.

“Yumi infomem olgeta blong monitarem ol lokol ia blong seven dei,” Mrs Kenneth i talem.

“Mo sapos oli soem eni saen blong COVID, oli mas letem mifala i save. Sapos weta i gud bae wan tim blong yumi i ko kasem Ambrym. Naoia i nogat eni wan i soem saen blong sik yet.

“Yumi talem tank yu long West Ambrym tasfos blong tekem aksen ariap mo putum ol lokol long kwarentin.”

Wan Reliable Sos i talem se ol crew blong Vanuatu Cargo i no bin tekem eni COVID tes from limit health risos.

Hemi talem se oli bin folem proses blong aplae mo spendem 48 haoa kwarentin bifo oli aot. Naoia bae hemi wan mas blong evri ship i mas tes bifo aot folem agrimen we Ministry blong Infrastructure mo Health i kat. Mo ol ship nao bae i pem own cost.

Reliable Sos i konfemem se ol crew blong Vanuatu Ferry i tes negativ tete mo naoia oli wet nomo blong statem bak ol trip i ko long ol aelan.

Vanuatu Cargo i stap long kwarentin long Santo.

 

(Visited 1143 times, 1 visits today)

About The Author

You might be interested in