Sam lokol i talem se Pacific Labour Scheme test i no fea.

Sam pipol i fil se seleksen criteria blong Pacific Labour Scheme long Port Vila i no fea.

VBTC Nius i witnesem long social media, plante komplen i kam long ol lokol long wik ia afta we oli ko tru long ol test blong English mo oli failem mo sam oli ova long weight blong olgeta.

Senior Labour Ofisa long Labour Dipatmen, Patrice Kuaotonga, i talem se Pacific Labour Scheme, hemi wan difren program blong tri yia.

Hemi talem se program ia hemi strict plante mo English blong ol pipol i mas stap long standard blong oli save ko wok.

“Taem bae oli ko wok long Australia, bae oli mas save gud hao blong toktok english from evri dei bae oli komuniket wetem supervisor o boss blong olgeta,” Mr Kuaotonga i talem.

“Exercise we hemi stap ko hed i blong bildim profile blong ol wokman redi blong ol fama i save selektem ol wokman blong ko wok.

“Long en blong manis February ia, i bin kat ova 1000 pipol oli pasem ol test blong english, fitness, high blood presa wetem height mo weight test aot long 4000 pipol we oli bin rijista long Port Vila.

Wik ia hemi seken wik we labour i kondaktem ol test blong selektem ol pipol blong pat long Pacific Labour Scheme.

Wan lokol mama, Sandrina Aru, we i bin lusum wok blong hem long taem blong COVID-19 pandemic ia, i talem se hemi interes bigwan blong pat long scheme ia.

“Mi arem pablik i stap tokbaot scheme ia mo mi interes long hem from mi wantem ko wok mo helpem family blong mi,” hemi talem.

“Naoia COVID-19 i mekem plante bisnis haos.”

Mr Kuaotonga long Labour Ofis, i talem se ol test ia hemi blong mekem wan redi pul i stap blong ol wokman.

“Eni taem wan boss long Australia i wantem rikruit 100 pipol mbe list I redi vinis i stap wetem ol infomesen blong olgeta,” Mr Kuaotonga i talem.

“Labour Dipatmen i bin pas long North Efate mo rijiisterem 120 pipol.

“Long Santo, Luganville, i kat 400 pipol i pasem ol test blong travel mo long Port Vila, yumi no finalisem wan namba yet blong hemia bae i hapen afta long ol jek.”

Mr Kuaotonga i talem se semak proses blong rijisterem ol pipol blong pat long Pacific Labour Scheme bae i hapen long ol nara aelan olsem Malekula mo Tanna wetem sam moa nara aelan.