Sanma COVID vaccine lonj

Lonj blong COVID-19 vaccine long Sanma bae i hapen long wednesday wik ia.

Director blong Public Health, Len Tarivonda, i talem se Kavman i mekem disisen blong dileiem lonjing long 23 August from i kat tu nara event tu blong lonj.

Mr Tarivonda i talem se lonj blong new ministerial health sector strategy blong 2021 -2030 mo niu leptospirosis strategic plan tu bae i hapen wetem COVID vaccine rolaot.

Hemi talem se disisen i kamoat long wiken blong posponem lonj ia from nomo i kat sam Memba blong Palemen blong Luganville mo Santo Rurol i wandem stap tu long lonj ia.
“Minista blong Ministry blong Health nao i sapos blong lonjem vaccination prokram mbe tufala event ia hemi national mekem se ol MP blong Santo tu i wantem pat long hem,” Mr Tarivonda i talem.

Plan hemi blong lonjem long eli wik ia wetem 100 pipol we oli stap long list blong karem fes dose blong olgeta.

Sanma Public Health Manager, Vanua Sikon i talem se Luganville Town, ples we COVID-19 vaccination bae i stap long hem, hemi long NISCOL Terminal graon floa. Ples ia nao Sanma vaccine tim bae oli station longwe blong tu wik blong provaedem vaccine feswan long ol risk grup olsem ol health wokman, ol franline wokman long wharf, transpot draeva mo ol pipol we oli kat sam sik vinis wetem olgeta wetem ol olfala afta jes ol nara grup blong pipol.

Mr Sikon i talem se tim bae i muv i ko long health center long ol area council raon long Sanma, stat long Canal Fanafo eria afta long Port Olry long east Santo, long Vulesepe Health Center long Saot Santo eria tu mo afta long Avunatari Health Center long Malo aelan.

“Long taem we tim i set up blong tu wik long ol difren health senta ia, evri dei bae i kat wan mobile tim i aot blong ko long ol difren komuniti long ol eria ia blong provaedem vaccine from ol isu blong aksesem.

“Wetem experiens long Shefa, asesibiliti hemi wan samting we plante pipol i komplen se oli nogat transpot fea blong kasem ol ples we oli save tekem ol stik meresin blong olgeta long hem. Yumi wantem impruvum hemia mo mekem wan gudfala coverage long rol aot blong COVID-19 vaccine long Sanma,” hemi talem.

Mr Sikon i talem se ol komuniti i welkamem tinktink blong mas tekem COVID-19 vaccine long taem we oli stap mekem awenes.

“Mifala i faenem se plante pipol oli konfus long stik meresin blong COVID-19,” hemi talem.

Hemi talem se Sanma COVID-19 vaccine awenes tim hemi wan gud wan from i kat ol dokta, nes mo ol pablik health ofisiol we oli givim trust long ol pipol long komuniti blong tekem vaccine.

Mr Sikon i talem se pipol i redi blong tekem vaccine. Ol representativ blong ol jej, woman mo yut wetem ol jif long ol difren komuniti i rispon blong talem se ol pipol blong olgeta i redi blong tekem covid vaccine long Sanma.

Hemi talem se i kat sam isu we awenes tim i fesem espeseli long ol infomesen we i no tru we i kamaot long sam jej mo sam grup blong ol pipol.

Mr Sikon i talem se awenes tim i dil wetem ol kiaman infomesen ia we i konfusum pipol.

(Visited 8 times, 1 visits today)

About The Author

You might be interested in