Sanma dei kastom tankiu seremoni

Wan kastom tankiu seremoni bae i hapen long Luganville long Sanma dei long septemba ia.

Secretary General blong Sanma Provins, Albert Ruddley, i talem se kastom seremoni ia hemi blong talem tankiu long ol nara provins blong helpem developmen blong Sanma long las 40 yia.

23 septemba hemi Sanma dei mo Mr Ruddley i stap invaetem pablik mo pipol blong Sanma blong pat long hem.

“Sanma dei long yia ia hemi spesel tumas from bambae Sanma Provinsiol kavman bae i talem tankiu long ol Presiden blong ol narafala Provins,”Mr Ruddley i talemaot.

“Mo mayor blong tufala Municipaliti long Luganville mo Port Vila from bigfala kontribusen we oli help bildimap Sanma.

“Long yia ia, yumi kat evri secretary general wetem ol presiden blong evri provins we bae oli stap long Santo long 22 mo 23 septemba ia.”

“Dei i stap kam antap long nekis wik,mo mifala i stap invaetem pipol blong evri narafala aelan mo provins blong kam tugeta mo selebretem dei ia tugeta.”

Bae i kat wan parade we bambae i stat long Unity Park i ko long Sanma steij long Chapuis.

Sanma Provins i putum tugeta wan program blong dei ia we bae hemi involvem ol presiden mo secretary General blong ol narafala faev provins.

Long wik ia i luk tu lonj blong olgeta souvenir item we bae i sale long makem Sanma dei long yia ia.

From risen ia administration mo konsel i stap invaetem evriwan blong pat long program blong dei ia.