Sanma i mas aplaem COVID-19 mesa

Luganville Mayor i kol long Sanma blong aplaem ol strik COVID-19 mesa.

Allan Awa i talem se ol pipol long Sanma i mas tinktink strong long situasen we Efate i stap long hem naoia we hemi 72 haoa lokdaon folem fes COVID-19 komuniti outbrek long Port Vila.

“Mi no tink se mesej ia hemi blong ol pipol long Port Vila mo Efate nomo,” Mr Awa i talem.

“Mbe hemi mesej we hemi sud ko raon long evri six provins blong kaontri. Mesej hemi yumi stap long wan kaontri, mo pipol i muv in mo aot long Efate mo yumi mas tekem i impoten.”

Mr Awa i mekem kol long ol pipol blong hem long Sanma blong passem mesej iko long olgeta we i finem hard blong access long information

“Blong yumi kontinu blong pasem infomesen long olgeta blong oli save long wanem we i stap hapen,” Mr Awa i talemaot.

“Hemia i save hapen long Port Vila mbe yumi nosave wanem bae i hapen long ol aelan blong yumi long ol dei we i stap kam.  Mi plis blong yumi mas kontinu blong aplaem ol aksen blong washem hand wetem sop mo wota, werem mask blong save sefem famili mo provins blong yu. Lisen long Radio oltaem mo folem infomesen long website blong Ministry blong Health blong kasem stret infomesen.

Minista blong Health, Honoroble Silas Bule i askem pipol blong no wet mbe ko tekem COVID-19 stik meresin blong nosave sik bigwan o ded long virus ia.

Ministry blong Health i askem sapot blong ol Jif, woman mo yangfala blong yusum ol netwok blong olgeta mo helpem ministry blong health blong mekem toksave long COVID-19 blong save help katem daon spread long komuniti.

 

 

 

(Visited 484 times, 1 visits today)

About The Author

You might be interested in