Sanma i pripea from COVID vaccine rolaot

Sanma Province i stap pripea blong rolemaot COVID vaccine.

Sanma Public Health i talem se rolaot blong COVID-19 vaccine bae i stat off long en blong August.

Sanma Public Health Manager, Vanua Sikon, i talem se Sanma Public Health i kat tri mo wik bifo roll aot blong COVID- 19 vaccine long Sanma.

Mr Sikon i talem se long taem naoia, Sanma Public Health i stap prepea long vaccine rollaot.

Hemi talem se COVID-19 awenes mo risk communication awenes i kontinu blong hapen long ol komuniti raon long Sanma mo awenes i stap ko gud.

Mr Sikon i talem se ol item mo equipmen blong yusum oli stap wok long hem blong setem ap ol fixed clinic.

Hemi talem se Luganville Town, ples we COVID-19 vaccination bae i stap long hem, hemi long NISCOL Terminal graon floa. Ples ia nao Sanma vaccine tim bae oli station longwe blong tu wik blong provaedem vaccine feswan long ol risk grup olsem ol health wokman, ol franline wokman long wharf, transpot draeva mo ol pipol we oli kat sam sik vinis wetem olgeta wetem ol olfala afta jes ol nara grup blong pipol.

Mr Sikon i talem se tim bae i muv i ko long health center long ol area council raon long Sanma, stat long Canal Fanafo eria afta long Port Olry long east Santo, long Vulesepe Health Center long Saot Santo eria tu mo afta long Avunatari Health Center long Malo aelan.

“Long taem we tim i set up blong tu wik long ol difren health senta ia, evri dei bae i kat wan mobile tim i aot blong ko long ol difren komuniti long ol eria ia blong provaedem vaccine from ol isu blong aksesem.

“Wetem experiens long Shefa, asesibiliti hemi wan samting we plante pipol i komplen se oli nogat transpot fea blong kasem ol ples we oli save tekem ol stik meresin blong olgeta long hem. Yumi wantem impruvum hemia mo mekem wan gudfala coverage long rol aot blong COVID-19 vaccine long Sanma,” hemi talem.

Mr Sikon i talem se ol komuniti i welkamem tinktink blong mas tekem COVID-19 vaccine long taem we oli stap mekem awenes.

“Mifala i faenem se plante pipol oli konfus long stik meresin blong COVID-19,” hemi talem.

Hemi talem se Sanma COVID-19 vaccine awenes tim hemi wan gud wan from i kat ol dokta, nes mo ol pablik health ofisiol we oli givim trust long ol pipol long komuniti blong tekem vaccine.

Mr Sikon i talem se pipol i redi blong tekem vaccine. Ol representativ blong ol jej, woman mo yut wetem ol jif long ol difren komuniti i rispon blong talem se ol pipol blong olgeta i redi blong tekem covid vaccine long Sanma.

Hemi talem se i kat sam isu we awenes tim i fesem espeseli long ol infomesen we i no tru we i kamaot long sam jej mo sam grup blong ol pipol.

Mr Sikon i talem se awenes tim i dil wetem ol kiaman infomesen ia we i konfusum pipol.