Sanma tourism i rere- Boda opening

Sanma Tourism operator i rere from opening blong boda long Friday ia.

Ol Tourism operator long Santo oli kam tugeta mo saenem wan komunikesen tul blong promotem wan informal promes bitwin international travela, Vanuatu tourism industry mo ol lokol komuniti blong kipim evriwan oli COVID sef, komunikesen tul ia oli singaotem she Nabanga pledge.

Espiritu Santo Tourism Association Representative, Rayman Leung i talem se fulap long ol bangalow mo ol restaurant long Santo oli bin operate smol long taem blong pandemic ia be naoia i taem blong opereit fulwan.

“Ol tourism bisnis we oli bin ron sloslo naoia hemi janis blong yumi blong leftemap kapasiti blong yumi,”

“Yumi save se i kat jalenj blong man pawa from plante oli ko pikim ap apple long Australia mo New Zealand be hemi taem yumi soem kapasiti blong yumi. Yumi laki se i kat sam skil i stap yet.”

Vanuatu Tourism Ofis Chief Executive Ofisa, Adela Aru i talem se ol operator long Sanma provins oli wok tugeta oltaem.

“Santo aelan hemi wan rili spesel turis destination long yumi long Vanuatu.

“Hemi haosem Champagne beach, hemi kat ol blue holes, i kat plante tracking, nature mo landscape we yumi wantem yusum. Mo i kat difren kaen acomodation mo aktiviti we i stap. Santo hemi redi blong yumi promotem blong ol turis i save kam bakegen. Aelan ia nomo i kat sam nara sekta we yumi wantaem se tourism bae i konek wetem olgeta olsem olgeta long Productive sector blong i sapotem recovery blong agriculture, hemi mekem sua se i kat enaf kakae i kobak long ol restaurant blong yumi. Hemia blong ol turis i save enjoyem ol fresh organic kakae we yumi long Santo i produsum.”

Be Lonnoc Echo Beach Bungalow Manager long East Santo, Kalmer Vocor, i talem se bigfala jalens hemi mani blong statem bak operesen.

“Bigfala jalenj we mi kat hemi finans mo mi biliv se sam nara pipol i kat; Exempol restaurant yu nid blong pem kakae blong i save opereit, so yumi nidim cash,” Mr Vocor i talem.

I no longtaem Santo i save risivim ol direct flaet ovasi, hemi asurens weh Chief Commercial Officer blong Air Vanuatu, Greg Wilson i talem.

Be Chief Executive Ofisa blong Airports Vanuatu, Jason Rakau i konfemem long VBTC Nius se mein fokas naoia hemi mekem sam meintenens fastaem long Airport.