Sanma vaksinesen i open bakeken

COVID-19 vaksinesen long NISCOL Terminal long Luganville Town i open bakeken stat tete Tosdei Maj 10.

Sanma COVID-19 Vaccination Team i konfemem se vaksinesen i on bageken mbe i no blong ful pablik long Luganville mo Sanma.

Susan Wokeke, Vaccine Delivery Lead blong Sanma Province, i talem se tete kasem nekis wik, vaksin long NISCOL i open nomo long ol pipol blong Tebroma, Banban mo Sore Graon area long Santo.

Wokeke i talem se nekis wik bae vaksinesen i fokas long ol pipol long ol nara eria long Sanma.

Ms Wokeke i talem se hem ia i blong avoidem over crowding long ples blong vaksin mo kipim sosol distensing.

So far 22,712 pipol long Sanma i fuli vaksinet vinis akensem COVID mo 27,037 pipol oli kasem vinis at least fes dos blong vaksin.

Sanma Provins i gat wan target population blong 33,924 eligible pipol we Sanma Helt i aim blong vaksinetem olgeta.

Ministri blong Helt i konfemem vinis naen positive COVID-19 cases long Luganville Santo.

Northern Provincial Hospital i konfemem se contact tracing blong olgeta naen kes i stap kohed mo everi positive kes i stap vinis long kwarentin.

 

(Visited 334 times, 1 visits today)

About The Author

You might be interested in