Saot East Ambrym i nidim wan nes

Saot East Ambrym i nidim wan nes kwiktaem blong provaedem health seves long bigfala namba blong ol sikman evri dei.

Jif Jimmy Larry blong Saot East Ambrym, i reisem harem nogud blong ol pipol long bihaf blong olgeta jif from nes we i bin stap long Utas helt centre ia i ronwe long wik ia.

Hemi talem se naoia, ol sick man oli ko wet blong karem medikol tritmen mbe i gat nomo wan nurse aid we i stap help long helt centre ia i stap.

“Mifala i wari bigwan naoia from sapos wan man i involv long wan aksiden, ol mama sapos oli wantem bonem bebe o ol nara health seves blong pipol i kasem i nosave nomo,”Jif Larry i talem.

“I gud ol health otoriti long Malampa Provins i lukluk ariap long isu ia mo sendem wan nes blong kam asistim aid nes long plesia blong tufala i save wok tugeta mo sevesem pipol kwik.

“I kat plante ol outpatien oli kam mbe from se aid nes ia hem wan nomo i wok.”

Jif Larry i talem i askem ol otoriti long Malampa Provinsiol health blong oli sendem wan nes i kam stap smol taem fastaem.

Manager blong Malampa Helt, Salome Kenneth, i talem long VBTC Nius se nes we i ronwe long Utas Helt Centre long Saot East Ambrym, olgeta long provins oli no awea long hem.

Hemi talem se bae hemi wok blong faenem aot moa informasen long mata ia.

Naoia, oli askem blong ol pipol blong Saot East oli patient, wael oli stap wok blong karem in wan riplesmen blong nes ia.

Ol jif oli fil se bifo wan nes i lego olgeta, long stret fasin blong ol pipol blong Vanuatu, i sud gat wan kaekae tugeta blong oli talem tankio long hem from seves we hemi provaedem long ol pipol blong Saot East Ambrym.

Jif Larry i askem kwik lukluk long mata ia.