Saot Santo i kwestenem dilei-Kolta rod projek

Saot Santo i kwestenem dilei blong kolta rod projek.

I no longtaem i pas, Saot Santo Eria Council i holem tu miting wetem ol draeva folem rabis rod kondisen.

Tufala jif blong tufala eria i reisem konsen long kavman.

“Rod i kamaot long wan steij se mifala i mas toktok ,” Jif Havo Tamata, jif blong Saot Santo eria 2.

“Mi askem kwiktaem blong pipol konsen i fixim rod blong save helpem mifala

“Ol transpot oli ron long rod ia oli fesem hadtem from rod i nogud,” Jif Hajuju Socovatu i talemaot.

“Fulap taem pipol i komplen long transpot be hemi no isi from ol trak sam pat i nogud. samtaem trak i slip wan o tu wik.”

Wan transport draeva, Ravitu Natilulu, i talem se samtaem ol mama i bonem bebe long rod nomo from rod i nogud.

Oli askem blong kat miting ia wetem ol man we oli lukaotem Sanma Public Works be oli no bin turn up.

Minista blong Infrastructure mo Public Utilities, Jay Ngwele i bin talemaot long Fes Ordinary Sitting blong Palemen long eli yia ia se tender blong saot Santo rod bae i hapen long June.

Minista Ngwele i talem se bae i tekem wan nara 12 manis blong konstraksen.

“Minista blong Finans i arenjem blong wan extra VT2 billion blong totol blong VT12 billion long Saot Santo rod,” Minista Ngwele i talem.

“Mo Korea Consultant kampani we hemi stap mekem design wetem ol engineering bae yumi sud luk fes tender blong rod we hemi stap long Saot Santo bae hemi kamaot long en blong June.

“Kondrak o tender blong Saot Santo rod hemi split long fo phase. So fo phase ia bae hemi stat wetem ol bridge mo yumi kat 19 bridge we bae hemi ko aot long tender long en blong June. Seken steij we bae hemi stat long bridge blong Luganville mo ko long nara bridge we bae hemi asphalt. Kolta long namba tri phase. Hemi wan bigfala projek.

“Mo bae hemi mekem wan bigfala impak long Saot santo espesili long farming. Yumi luksave tu se climate change hemi mekem wan bigfala impak folem ol riva we i ron we i jensem plante ol rod long Santo. Weta i no favorem ol wok we bae i stat, mo mi biliv se ol pipol bae i wok wetem yumi blong luksave ol plan ia.”

Communication Ofisa blong Ministry blong Infrastructure mo Public Utilities,  Antoine Malsungai i talem se hemi wok blong Sanma Public Works i wok tugeta blong faenem sam wei blong mekem ol smol meintenens long rod.

Mr Malsungai i talem se ol wok i save stat long en blong yia ia.

“Mi mas talem se Saot Santo rod tender blong hem i stap kamaot long wiken mo kavman i no sakem towel yet long isu ia,” Mr Malsungai i talem.

“Bae yumi stil wokem taem yumi faenem wan kondrata blong hemi save adresem ful 67 kilomita we bae i ko kasem Tassiriki.”

Kolta rod projek i kavarem ap ova 500 vilij.

 

(Visited 425 times, 1 visits today)

About The Author

You might be interested in