Rikwes blong gudfala rod-Saot West Malekula

Saot West Malekula i askem gudfala rod akses long ol seves.

Eria Administrata blong Saot West Malekula, Gerald Tamau, i talem toktok ia folem kol blong ol pipol taem Prime Minista, Honoroble Bob Loughman, i visitim fo komuniti long Saot West Malekula long wik ia.

Mr Tamau i talem se plante taem ol fama i mas wokbaot longwe antap long hil blong moa long 2KM wetem ol kakae blong kasem ship pasis long solwota.

Hemi talem se ol Lolror Port hemi wan mas blong kavman i mas lukluk long plan blong hem long yia ia.

“Yumi save se long Saot, Saot West Bay long Malekula, akses blong kasem solwota, ples we ship i stap anchor long hem, ol fama i mas travel longwe,” Mr Tamau i talem.

“Mo espeseli long Lolror vilij; eria blong wan mein port long vilij, we pipol blong Wintua, Lolror mo ol seves we oli stap araon olsem Saot East eria kaonsel, Primary skul mo airstrip oli mas kasem port ia mo naoia we ren i ren plante rod kondisen i nogud bigwan.

Mr Tamau i talem se oli wantem wan concrete pavemen long rod ia blong gud akses blong ship.

Long wik ia, Mr Tamau i talem se Prime Minista, Honoroble Bob Loughman, Kavman i bin diklarem tu kilomita memorial rod long Saot Malekula long wik ia blong konektem Saot mo Saot West Malekula kasem Lambubu.

“Hemi wan memorial rod blong tinkbaot leit Memba blong Palemen blong Saot Malekula, ” Mr Tamau i talem.

“Rod ia blong konektem rod long Farun, ko kasem Saot West Bay mo Lambubu. Taem ol pipol long Caroline Bay long Saot West Malekula i kivim rikwes blong rod mbe Prime Minista Loughman i ansa se rod ia bae i konektem ful eria long Saot mo Saot West Malekula.

“Hemi ova long 50 kilomita from hemi kavremap bigfala eria.

Mr Tamau i talem se nem hemi John Sala rod.

(Visited 179 times, 1 visits today)

About The Author

You might be interested in