Scholarship budget i no enaf

Ministry blong Education mo Training i kleim se Scholarship Unit i nokat enaf mani long scholarship budget.

Honoroble Seule Simeon i admitim long toktok blong hem long wik ia folem longtaem isu blong studen alaowens blong ol Vanuatu Kavman sponsa studen long Vanuatu mo ovasi.

Long wik ia, Prime Minista, Honoroble Bob Loughman, i kivim wan instraksen long Deputy Prime Minista, Honoroble Ismael Kalsakau, blong mit wetem Minista Simeon mo Minista blong Finance mo Economic Management, Honoroble Johnny Koanapo, mo solvem longtaem isu blong leit alaowens long wik ia nomo.

Kavman i stap givim wan amaon blong VT 800 million blong fandem ol scholarship evri yia mo ova 500 studen i stap sponsor wetem budget ia evri yia.

Deputy Prime Minista, Ismael i admitim se long yia ia, i gat sam studen we oli no bin kraeteria blong tekem scholarship mbe oli nosave hao oli awodem wan.

Hemi talem se hemia i serious tumas mo kavman bae i wok long wan gudfala proses long hao blong adresem blong i nomo kat dilei long futja.

Long yia ia, kavman wetem sapot blong Vanuatu National Provident Fund i kivim aot scholarship long 2039 studen.1400 hemi ol studen we oli stil kontinu long stadi mo 639 hemi ol niu wan.

Minista we i risponsibol long education, Mr Simeon, i talem se nomata long jalenj ia, oli wok had blong ol kavman sponsor studen ia i sud tekem ol alaowens blong olgeta long wik ia.

“I kat 447 studen we bae oli tekem alaowens we hemi stat long period blong eli yia ia,” Minista Simeon i talem.

“Aot long namba ia i kat 53 ol niu wan, 46 oli jensem course, six oli stap long extension course mo oli bin rijista bakeken wetem University blong South Pacific afta we Vanuatu National Provident Fund i wonem olgeta from oli failem majoriti long ol course blong olgeta.

“Mo 13 oli tekem ol pilot stadi.

“I kat 285 studen we Vanuatu National Provident Fund i pem olgeta fi blong olgeta folem akrimen wetem kavman.

“Mo nara 44 studen we Laucala University blong South Pacific i rigistarem olgeta bakeken from oli failem ol course afta we Vanuatu National Provident Fund i se bae i nomo sponsarem olgeta.”

Minista Simeon i kol long ol 165 studen blong mas sabmitim ol bank infomesen i kam long Scholarship Unit.

“Mi askem long ol studen ia blong mas sabmitim ol bank ditel blong olgeta bifo 23 April blong oli save prosesem ol alaowens i ko insaed long hem,” Minista Simeon i talem.

Wan Ni-Vanuatu Lecturer long Laucala Campas long Fiji, Robson Tigona, i talem se taem alaowens i dilei, ol studen i wari from oli stap long wan nara kaontri.

Hemi talem se taem oli wari, i afektem stadi blong olgeta nao.

“Taem alaowens i dilei, ol studen i angre from oli no kakae gud tu from oli nokat mani, “ Mr Tigona i talem.

“Taem oli no kakae ol healti kakae, i mekem oli no stadi gud.

“Ol healti kakae hemi ol kakae long ol market mbe from COVID i mekem se sam kakae praes i ko antap.

“Mo hemi impoten blong alaowens i mas kam long taem.”

Long wik ia, ol Ni-Vanuatu we oli wok long Mind Pearl, wan International Call Centre long Suva, Fiji, i givim sam kakae long ol studen blong Vanuatu long Fiji folem dilei blong alaowens.

Opposition Lida, Honoroble Ralph Regenvanu, i bin kol long kavman blong luksave risponsibiliti blong hem long taem blong COVID ia mo helpem ol pipol blong hem.

Deputy Prime Minista Kalsakau i talem se sapos wan studen i no risivim yet alaowens blong hem long en blong wik ia, hemi mas letem kavman i save blong oli akt.

“Mi hop se long en blong wik ia, bambae i nomo kat wan studen i komplen,” Mr Kalsakau i talem.

“Kavman bae i mekem evri wei blong adresem isu ia blong i nomo hapen.”

Taem we Minista Simeon i tekem ap posisen blong niufala minista blong education long 2020, hemi askem blong Schorlarship Unit i tekem ap wok blong lukluk long ol studen alaowens we Ministry blong Finance i bin stap mekem bifo vinis.

“Olsem Minista konsen, mi sori bigwan long situation ia we i hapen,” Minista Simeon i talem.

“Mi wantem talem sori long evri parents se ol pikinini blong yumi i no sud fesem ol kaen jalenj olsem.”

Sam long studen ovasi oli no bin kasem alaowens afta long las alaowens long December 2020.

 

 

 

 

 

 

 

(Visited 1964 times, 1 visits today)

About The Author

You might be interested in