Seasonal wokman i no alao -New Zealand

Ol boda agensi blong New Zealand i sendem bak wan Ni-Vanuatu seasonal wokman from hemi kat pas criminal rikod.

Labour Commissioner, Murielle Metsan Meltenoven, i talem long VBTC Nius se hemi festaem blong wokman ia i travel anda long kwarentin fri travel mo hemi bin diklare konvikted taem hemi kasem ChristChurch, New Zealand long 14 Decemba.

VBTC Nius i kasem toksave se wok man ia hemi bin convicted long wan kot of law long Vanuatu bak long 2016, nature blong ofens we hemi komitim hemi serious, hemi bin judge wetem one count blong sexual intercourse without consent, three counts blong Unlawful sexual intercourse, one count of Act of Indecency wetem young pesen.

“Taem hemi kasem long New Zealand, long arivol kad, hemi bin kliarem se hemi wan convicted pesen mo hemi talemaot rong we hemi bin mekem, length we hemi bin sevem sentence blong hem, mbe declaration blong hem i no welcome wetem ol boda control ofisa blong Immigration New Zealand,” Mrs Meltenoven.

Commissioner Meltenoven i talem se ol rong we hemi bin mekem i serious mbe hemi bin sevem sentens blong hem finis long Correctional Centre.

Hemi talem se from risen ia nao, Vanuatu Polis Force i grantem hem wan polis kliarens.

Mbe ol boarder agensi blong New Zealand oli no acceptem hem mo sendem bak hem long semak jata flaet we i bin tekem sam moa seasonal wokman long 14 Decemba ia.

Commissioner Meltenoven i kontinu blong talem se New Zealand mo Australia oli strik wetem ol kaen olsem.

Hemi askem ol pipol blong Vanuatu se bifo oli tingting blong involvem olgeta long wan criminal olsem oli mas keaful from lukaot i save stopem olgeta long eni futja opotuniti ovasi.

“Yumi andastanem se wokman ia hemi bin sevem ful sentens blong hem mo long loa blong yumi taem yu komplitim sentens, oli rilisim yu mo yu kam wan fri man,”Mrs Meltenoven i talem.

“So, hemi mitim evri entry rikwamen blong save pat long program, polis kliarens blong hem i bin klia long ol rong we hemi bin mekem.

Naoia man ia i stap long kwarentin.