Ol seasonal wokman i mas stop aplae from proteksen visa

Commissioner blong Labour i kol long ol seasonal wokman blong Australia blong stop aplae from temporari proteksen visa ova sea.

Murielle Meltenoven, i talem se temporari proteksen visa ia i no stret blong ol wokman oli aplae from i no aplae long Vanuatu.

“ Temporari proteksen visa hemi visa we oli grantem mo givim long ol man we oli fraet blong ko bak long kaontri blong olketa from i kat war long kaontri blong olketa i ko long Australia,” hemi talem.

“ Mbe yumi long Vanuatu yumi nokat war, yumi kat pis mo yumi stap fri long Vanuatu mo taem ol ol ni-vanuatu seasonal wokman oli kambak bae oli nosave ko tru long rabis tritmen.

“ Temporary proteksen visa or wanem oli singaotem asylum hemi wan visa we Kavman blong Australia i givim long ol pipol we oli nidim proteksen long ples blong permanen proteksen visa.

Mrs Meltenoven i talem se visa olsem ia, Australia hemi stap kivim long ol pipol we i stap ronwei long ol ples blong olgeta from situasen olsem war or faet.

“ Hemi no stret blong ol seasonal wokman i aplae from visa ia from taem oli travel oli kat visa,” hemi talem.

“ Temporari proteksen visa ia hemi availabol nomo long ol pipol we oli kasem Australia mo oli nokat wan visa wetem olketa.

“ Mi askem ol seasonal wokman blong no pat long kaen pratis olsem from i save spoilem nem blong Vanuatu we i stap sendem wan bigfala namba blong ol wokman i ko ova sea.”

Commissioner Meltenoven i talem se “Long infomesen blong everi wan nomo se long manis ia November, ol wokman we oli pat long Seasonal Workers Program mo long Pacific Labour Scheme bae kavman blong Australia i skrinim ol visa blong olketa.”

“ Mo hemia ia bae ol wokman i nosave eligibol long wan temporary proteksen visa ia nomo from bae i no alao nomo long olketa,” hemi talem.

“ Labour Department i askem strong ol seasonal wokman blong rispektem polisi blong program from bae i save afektem famili blong olgeta we i kam afta blong joinem scheme.

Temporari proteksen visa ia hemi alaoem wan man blong save stap long Australia long tu kasem tri yia.

 

 

 

(Visited 3426 times, 1 visits today)

About The Author

You might be interested in