Secretary General blong Penama i saspen

Public Service Commission hem i saspendem Secretary General blong Penama Province, Judah Garoleo.

Secretary General blong Public Service Commission, Jean Eyve Bibi, i talem se suspension blong Judah Garoleo, hemi folem sam alekesen we i bin ko akensem hem folem attitude mo fasin blong karemaot wok.

Mr Bibi i talem se i gat plante alekesen we i bin ko akensem Mr Garoleo.

“Taem Saeklon Harold hem i strike, instead blong hem i kodinetem ol rilif long Penama espeseli long Pentecost, hem i travel i kam long Vila,” Mr Bibi i talem.

“Narafala fomol komplen, i kam long Minister blong Trade, James Bule, we i talem se long taem blong ofisiel visit blong hem i ko long Ambae, Mr Garoleo i no bin stap blong welkamem hem.

“Narafala serious alekesen we i ko akensem hem, hem i folem disisen blong Council blong ol Minista blong riloketem bak Provincial Kavman Headquota long Penama we i stap long Loltong blong kobak long Saratamata. Mbe Mr Garaleo hem i slo blong implementem.”

Secretary General blong Public Service Commission, i talem se bes long ol serious alekesen ia, Public Service Commission hem i saspentem hem blong 21 dei blong kivim taem long hem blong respon long ol alekesen ia.

Hem i talem se commission hem i bin risivim wan formal complen i kam long Director General blong Internal Affairs mo Director blong Dipatmen blong local otoriti.

Public Service Commission hem i bin sidaon long las wik Fraedei blong disaed long saspensen ia.

VBTC i no bin save kasem Mr Garoleo blong kasem respons blong hem.

(Visited 149 times, 1 visits today)

You might be interested in