Seken repatriation i en long december

COVID-19 advisori komiti i talem se seken pat blong repatriation bae i en long eli December.

Spokespersen blong COVID-19, Len Tarivonda, i talem se komiti blong COVID-19 i akri blong las flaet blong seken repatriation bae i stap long namba seven December.

Hemi talem se “ Hemia i blong alaoem ol pipol we oli kambak long kaontri blong vinisim fortin dei kwarentin blong olketa mo ko joinem ol famili blong olketa blong selebretem krismas.”

“Hemia blong kivim spel tu long olketa dokta mo nes mo even ol ofisa we oli stap long boda wetem ol polis Ofisa blong olketa tu oli ko spendem taem wetem ol famili blong olketa,” Mr Tarivonda i talem.

“Yumi wantem stopem repatriation blong tu o tri wik olsem long manis December ia.

“Hemia nao i stap long plan naoia mo National Disaster Management Ofis mo National Disasta komiti nao bai i jas mekem finol diskasen. “

Mr Tarivonda i talem se bae namba tri repatriation i save ko hed long midel blong January 2021.

“Long manis December taem seken pat blong repatriation i vinis, yumi save se i kat plante pipol blong Vanuatu ovasi we oli wantem kambak mo hemia nao mifala i stap toktok raon long hem,” hemi talem.

“Kavman bae i jes disaed long weta state blong emergency blong COVID-19 i extend or i vinis nomo long 31 December.”

Wetem hemia Ministry blong Health i mekem ova 100 test blong COVID- 19 long ol repatriate we oli kambak long kaontri.

Mr Tarivonda i talem se ol test ia hemi blong olketa pipol we oli kam long ol kaontri olsem Australia mo New Zealand we i kat ol hae kes blong coronavirus long hem.

Hemi talem se hemia i folem limit COVID-19 tes we Vanuatu i kat blong mekem.

“Wanem mifala i mekem taem ol pipol i kambak long kaontri, mifala i kat wan database we mifala i stap folem,” Mr Tarivonda i talem.

“Mifala i entarem nem mo kaontri we oli kam long hem i ko long sistem ia mo semtaem masin i pointem aot stret namba blong COVID-19 kes we i stap long kaontri we oli kam long hem.

“Ol pipol ia we oli kam long kaontri we i kat plante kes blong COVID-19 oli mas ko tru long tu difren tes.”

Mr Tarivonda i talem se ol tes we oli bin mekem i soem se ol pipol ia oli no kasem COVID-19.

Hemi talem se fes tes oli mekem long ol pipol ia taem oli jas kam in nomo long kaontri mo namba tu tes long namba eleven dei blong olgeta long kwarentin.

“Wan jalens blong yumi hem i yumi mas trenem moa ol dokta mo nes blong tekem ol swap tru long nose mo tru long maot blong ol pipol we oli stap kambak,” Mr Tarivonda i talem.

Kavman i repatriatem 1,907 pipol long seken repatriation ia, 1,402 pipol i rilis finis long kwarentin mo 505 oli stil stap yet long kwarentin.

(Visited 590 times, 1 visits today)

About The Author

You might be interested in