Selebretem festiv sisen wetem pis-Polis

Polis i kol blong pipol i selebretem festiv sisen ia wetem pis.

Commanda Infentri, Major Astropile Newell, i talem ol pipol i no alao blong drink alcohol mo mekem noise long pablik eria.

Hemi talem se pipol i no alao blong sakem ol rabis toktok long pablik o traem blong distembem nara pipol from fasin ia i brekem loa blong Vanuatu.

“Mi askem nomo blong taem yu tekem alcohol,  tinbaot se yu ko long ples we yu pem lem mo drink o u ko slip o kobak long hom mo drink,”Mr Newell i talem.

Mr Newell i talem se polis i kat raet blong arestem ol pipol we oli involv long alcohol long pablik eria mo putum olgeta long namba six.

Sergeant Rayndol Ala, Communication Liason Ofisa blong Polis Crime Unit, i talem se naoia fasen blong wok blong polis i jens mo hemi impoten blong talem no long crime.

Hemi talem se Polis Operation Noel bae i run tru long sam prosija sapos hemi stap anda long investikesen.

“Bae taem polis i tekem wan man i kam daon long Polis Station, hemi investikeit mo taem hemi leko yu ko, hemi bailem yu semtaem we i minim se taem u kamaot kalapus, oli kivim wan pis pepa long wanem taem stret nao yu pas kot,” Sergeant Ala i talem.

“Mo bambae hemi nomo olsem oltaem we yu kambak wet blong oli givim wan notis long yu se taem ia bae yu ko long kot.”

Ol toksave blong Vanuatu Polis Fos ia hemi pat blong Opereson Noel blong mekem sua se ol sitisen blong kaontri oli selebretem bikfala dei wetem pis mo laef long sef peles oltaem mo blong komuniti i mas tekem onasip blong lukaotem gud ol memba blong komuniti blong hem.