Seven dei isolation blong RSE

Ol Recognised Seasonal Employer wokman we oli travel tete i ko long New Zealand bae oli no ko long 14 dei kwarentin blong COVID mbe seven dei isolation nomo.

Hemi wan niu akrimen we Kavman blong New Zealand mo Vanuatu i saenem long eli October ia blong alaoem kwarentin fri travel i ko long eria long Christchruch, New Zealand.

Commissioner blong Labour, Murielle Metsan Meltenoven, i talem se hemi gud tumas from New Zealand i konfiden long Vanuatu olsem wan COVID -19 fri kaontri.

Mrs Meltenoven i talem se akrimen ia hemi blong wan wei taem ol wokman i ko oli ko stap aot blong seven dei; Dei zero kasem faev hemi ol tes blong COVID mo namba seven dei oli aot.

Commissioner Meltenoven i talem se olgeta 150 wokman ia oli tekem COVID vaccine finis;  sam oli tekem nomo fes dose blong Astrazeneca mo bae oli tekem Pfizer vaccine blong kompletem dose blong olgeta taem oli kasem New Zealand.

High Commissioner blong New Zealand long Vanuatu, Johnathan Schwass, i talem se bae oli trilem aot kwarentin fri travel ia wetem ol seasonal wokman blong Vanuatu feswan.

Mr Schwass i talem se sapos triol ia i wok aot gud bae oli extendem i ko long ol kavman minista.

Mr Schwass i mekem toktok ia taem hem mo Prime Minista, Bob Loughman i mit blong Prime Minista, Honoroble Bob Loughman i saenem akrimen.

Hemi talem se semak akrimen ia, Prime Minista blong New Zealand, Jacinda Ardern tu i saenem tu long New Zealand.

Lory Thompson, wan seasonal wokman i asurem tufala kavman se sins olgeta oli ol fes grup blong ko anda long akrimen ia, bae oli folem ol protocol we i stap.

Prime Minista, Bob Loughman i talem se akrimen ia hemi wan gudfala tinktink mo espeseli taem we Vanuatu i wandem gat travel bubble wetem New Zealand.

Prime Minista Loughman i talem se sapos,triol ia i wok aot bai i gat hae janis blong openem boda wetem New Zealand.

Commissioner Meltenoven i talem se olgeta 150 wokman ia oli tekem vaccine finis, sam oli tekem nomo at least one dose blong Astrazeneca mo bai tekem Pfizer vaccine blong kompletem dose blong olgeta taem oli kasem New Zealand.

Director blong Pablik Helt, Len Tarivonda i talem se World Health Organization i rikomen blong pipol i save mixim COVID vaccine espeseli Astrazeneca mo Pfizer.

Hemi talem se stadi i soem se taem pipol i mixim vaccine i bostem antibody rispons.

Vanuatu hemi fes kauntri long pasifik we New Zealand i alaoem hem blong travel i ko long Christchurch mo no ko tru long kwarentin.

 

(Visited 1968 times, 1 visits today)

About The Author

You might be interested in