Shefa i winim futbol championship league

Namba tri sco blong Tonli Kalotang long penalti box blong Sanma i putum tim Shefa long fes ples wetem VT 1 million.

Trifala sco blong Mr Kalotang i mekem Shefa Football Association i winim 2020 Vanuatu Football Federation National Championship League.

Noel Benjamin, Head Coach blong Shefa Football Association, i talem se hemi glad tumas long kem ia.

Shefa i winim Sanma long wan klos skoa blong 3-2 long las Satedei long Korman Stadium long Port Vila.

Koj blong Shefa i talem se, hemi glad tumas long pefomens blong ol pleia blong tim blong hem.

Mr Benjamin i talem tu se hemi gud tumas blong wan tim blong Sanma i plei gud tu olsem from oli kam long rural eria mo oli putum aot wan pefomens we hemi jalenjem tim Shefa.

Head coach blong Sanma Tim, Samuel Aijivi, i talem se wetem aotkam  blong kem ia i lukim bigfala developmen insaed long tim blong hem.

Hemi talem se “Ol boy blong mi oli jes stap kat ol experiens nao mo mi glad from sam taem sapos mifala plei wan moa kem olsem, mi biliv se bambae mifala i mekem gud tru long Papa God we i givim save mo pawa long ol pleia blong mi.”

“Mo hem ia nao oli soem wan gud kem mo long heart blong mi, mi arem mi glad tumas,” Mr Aijivi i talem.

Sanma i openem skoa, mo putum fes poin akensem Shefa long fes haf blong kem, mo poin ia hemi kam long Anthony Belly.

Shefa hemi equalizem sko long 45 minit blong fes hav bifo tufala tim i ko long 15 minit break.

Lo seken haf i lukim Tony Kalotang blong Shefa i skorem nambatu poin blong tim Shefa.

Runner up, Sanma hemi risivim VT 500,000 olsem nambatu praes.

Vanuatu Football Federation National Championship League i stap hapen everi yia blong leftemap developmen blong football long kaontri.

 

 

(Visited 32 times, 1 visits today)

About The Author

You might be interested in