Shefa rurol i kat low literacy reit

Shefa Education Forum i faenemaot se Shefa rural i gat low literacy reit long Vanuatu.

Vice Chairman blong Shefa Day selebresen 2021, Fred Samuel, i konfemem wetem VBTC Nius long Shefa day long Korman Stadium, Port Vila.

VBTC Nius i kasem toksave se low reit blong literacy mo numeracy hemi kamaot long ol skul long ol rurol eria olsem Epi, Sherpherds mo rurol Efate.

Shefa provins i oltaem kam namba fo long list blong ol provins education risal mo hemia i inkludum risal blong ol studen long Port Vila mo Shefa rurol.

Mr Samuel i talem se ol data ia hemi no gud.

“Sam long ol isu we yumi faenem hemi pua perfomens blong ol tija long ol skul, “ Mr Samuel i talem.

“Mo ol studen blong shefa i no mekem gud wok long klasrum.

“Yumi mas wok blong adresem mo impruvum literacy mo numeracy long ol yang generation we oli stap kam antap.

“Mo hemia nao hemi pepes blong organisem ol forum olsem; no blong jes entertainmen mbe yumi faenem ol isu olsem mo help adresem.”

Ol wei fowod we i kamaot long forum ia hemi blong inkrisim parental sapot, ol tija long shefa i mas be olgeta we oli kat qualification mo bachelor blong save provaedem kwaliti standard, ol tija ia i mas yusum ol best praktis o method we ol studen i lan gud long hem.

Mr Samuel i talem se ol wei fowod we oli kam ap wetem blong help impruvum ol eria ia.

Hemi talem se oli putum sam wei fowod blong impruvum ol infrastructure long saed blong health tu.

“Yumi wantem kontinu long kaen aktiviti olsem long ol yia i kam blong educate mo entertain,” Mr Samuel i talem.

“Moa forum blong agriculture mo bisnis i mas gat blong yumi help developem shefa mo kontribut long national developmen blong Vanuatu.

Shefa dei selebresen tim blong 2021 i bin resem araon VT 5Million tru long sponsorship mo fandrasing blong organisem ol forum mo even selebret wetem ol live entertainemen.

Mr Samuel i talem tankiu long ol pipol blong shefa we oli bin turn ap long taem blong parade stat long Saralana pas tru long town, stade eria mo ko long Korman.

“June 18 hemi wan impoten dei blong ol pipol long Shefa mbe hemi gud we pipol i turn ap long haf pas 7,” Mr Samuel i talem.

Long sam nara ples long kaontri olsem long Lugainville i lukim ol shefa pipol i mekem wan kastom seremoni i long komuniti lida blong Luganville blong soem rispek we oli bin alaoem olgeta blong liv long Santo.

 

 

 

 

(Visited 81 times, 1 visits today)

About The Author

You might be interested in