Ship seves i no kasem gud Tafea

Sam pat blong Tafea Provins oli nomo risivim ship seves blong kavman sabsidy blong ova six manis.

Kaonsela Henry Utwor blong Erromango i talem se krae blong pipol i bigwan from projek i nomo kasem stret wok blong hem.

“Fulap seves blong transpot, mo ship i slowem daon ol developmen long yumi long aelan. I kat sam projek we mifala ol kaonsela i wantem mekem be from ship i no kam mekem se i nosave ko hed nomo,” Mr Utwor i talemaot.

“Mifala i bin mitim sam owna blong ol ship vinis be oli no givim sam ansa yet; Afta we yumi tekem ol tinktink blong olgeta bae yumi kobak long kavman blong luk hao save impruvum.”

“Long eli yia ia, mifala i bin luk wan ship i kam be i tanem raon nomo long Aneityum i ko bak. Taem outbreak blong COVID i kamaot long March ia, ship i no ron koko. Long May ia nomo wan ship i kam kasem naoia i nomo kat wan mo ship i kam long aelan blong Futuna,” Isso Nihmei, Eria Administrata blong Futuna i talemaot.

“Mifala i kat ol cargo blong mifala we i sud kasem aelan be i nogat ship blong tekem i kam.”

Kavman shipping sabsidi aproj ia hemi blong evriwan i gat ikwel shea long sevis deliveri mo hemi blong sevesem ol ples we i nokat tumas ekonomik aktiviti long hem.

Owna blong LC Tiwi Trader, Peter Pata, i talem se ship i provaedem seves long west pat blong Tafea mo i no bin save kontinu blong sam manis from hemi ko long slipway.

Be Mr Pata i konfemem se bae oli statem bak ol seves ia bageken.

“Ship i kaveremap Tanna, Erromango mo Aneityum nomo; Mifala i no stap sevesem aelan blong Futuna from i stap long sabsidy east. Taem mifala i kasem instraksen nao bae mifala i save mekem seves i ko. Naoia mifala i kasem wan instraksen vinis blong ko long Futuna. Taem mifala i statem sabsidy trip long en blong manis ia bae mifala i ko long Futuna tu.

Kavman mo ol dona patna i sabsidaesem shipping seves i ko long rimot pat blong Vanuatu.

 

 

 

 

 

(Visited 347 times, 1 visits today)

About The Author

You might be interested in