Sik blong sugar i inkris long eria blong Point cross

Vanuatu Family Health Association i talem se Non-Communicabol Disis i kam antap long eria blong Point Cross long saot Pentecost.

Nurse blong Vanuatu Family Health Tim long Santo, Nicole Bomere, i talem se sik ia i kam antap afta long Saeklon Harold from plante kakae long karen i distroe mo ol man i depen naoia long ol kakae blong stoa.

Hemi talem se wanem oli faenem se i kat ova 25 pipol oli kasem ol sik blong sugar mo high blood presa.

“Majoriti long olketa pipol we oli kasem tufala sik ia, hemi ol olfala long age blong 50 i ko antap mo ol middle age blong 30 kasem 45 yia olsem,” Mr Bomere i talem.

“Mifala i kivim ol medicin long olketa mo enkarejem olketa blong mas kakae ol stret kakae we I helti.

“Wanem oli stap mekem naoia long eria blong Point Cross hemi blong mekem moa aweanes long ol kakae we i kat tumas suka, sol mo oil blong pipol i mas stop blong kakae tumas from i kam wetem sik.”

Mrs Bomere i talem se afta long Saeklon Harold, Department blong Agriculture i bin kam long aelan blong Pentecost mo enkarejem ol pipol blong mas mekem karen mo kakae long hem.

“Mo naoia mifala i stap educatem ol pipol long Point Cross blong mas planem moa lokol kakae.

“Wan nara sik we mifala i faenem hemi flu mo diarrhoea, afta long Saeklon Harold plante pipol i nomo kat gudfala akses long wota mo i mekem plante oli kof mo bel i ron.”

Mrs Bomere i talem se tim blong Family Health i stap naoia long Pentecost blong kivimaot fri helt seves I ko long olketa pipol.

Hemi talem se wan helt seves we oli stap kivimaot tu hemi long saed blong educatem ol mama mo ol yangfala gel long saed blong ol difren family planning method.

“Wan long ol risen from wanem mifala i mekem ol aweanes blong family planning hemi blong hao ol family i spesem ol pikinini blong olketa long wei we oli save lukaotem,” Mrs Bomere i talem.

“Yumi save se long taem blong disasta, plante mama bae i nokat taem blong stap lukaotem ol pikinini.

“Mo naoia tinej preknensi i kam antap bigwan long ol rurol eria so yumi traem blong helpem ol yangfala kel tu, long ol wei we oli save lukaotem gud bodi blong olketa.

“Mo yumi kivimaot ol condom mo mekem aweaness tu long ol sik blong Sexual Transmitted Disease o ol sik blong sex.”

Mrs Bomere i kol long ol komuniti lida blong Pentecost blong mas letem ol pipol blong olketa i kasem ol fri helt seves we oli stap karemaot long eria blong olketa.

Hemi talem se ol mama mo gel tu i mas kam plante from cervical cancer we i kam antap bigwan long kaontri.

Hem i talem se i kat tu grup blong Vanuatu Family Health we oli stap provaedem ol helt seves long Point cross.

Wan grup oli stap mekem aotrij mo nara wan oli stap long wan ples mo provaedem seves.

Wan lokol blong Pentecost i talem se hemi gud blong kasem ol seves blong helt olsem long ol rural eria.

 

 

(Visited 27 times, 1 visits today)

About The Author

You might be interested in