Silicon injeksen i stil wan bigfala isu

Vila Central Hospital i kontinu blong luk bigfala namba blong ol sik man wetem silikon injeksen.

Dr Richard Leona, wan surgeon we i speselise long eria blong urologist o eria long rod blong pispis mo kidney, i askem Kavman blong lukluk serious long mata ia.

Silikon injeksen hemi wan injeksen we ol man oli stap yusum blong mekem praevaet pat blong olketa i bigwan.

Dr Leona i talem se, “Naoia silicon injeksen i kam wan bigfala problem long Vanuatu.”

“Ating bae mi ripitim wanem mi bin talem long tokbak sho long VBTC  las yia se, kavman i nid blong putum ol regulation o loa araon long yus blong item olsem insaed long kaontri,” hemi talem.

“Hemi from i afektem laef blong wan man mo even famili laef blong wan hom.

“Mo sapos i nidim wan act, i mas kat wan from kavman i mas adresem isu ia kwiktaem.

“Silicon hemi wan material we hemi no sapos blong stap insaed long bodi blong yumi ol man o ol boy, from taem yu putum wan foreign samting i ko insaed long bodi, bodi i react long hem from hemi no akseptem mo hemi kosem tisu reaction mo i mekem penis i solap mo i bigwan mo i kasem steij we man i nomo save werem trauses.

“Mo hemia nao hao bigwan hemi save gro mo i afektem tu rod blong pispis.”

Long wan pre-depature briefing blong ol seasonal wokman sam taem i pas, ol customs ofisa i bin mekem wan awarenes mo talem se anda long customs regulation 113 blong 2014, ol item olsem penis pump i no alao blong kam insaed long kaontri, anles wan wokman i karem wan pepa long doctor blong talem se bodi blong hem i nomo save wok gud mo hemi nidim penis pump.

Customs i askem strong ol seasonal wokman blong stop tekem ol penis pump i kam long kaontri from hemi akensem loa.

Dr Leona i talem se, “Taem oli man ia oli kat problem wetem injeksen blong silicon ia, mo oli kam luk mi, i minim se oli nosave silip wetem waef o kelfren blong olketa blong sam taem.”

Hemi talem se mo hemia i afektem relationsip blong olketa tu from bae oli nokat sexual relationshp mo bae hemi had ia.

“Silicon injkesen i kosem problem bitim ol nara wan mo wanem we i interest se ol man ia oli kam long difren wok blong laef,” hemi talem.

“Even ol sesonal wokman oli kasem injeksen ia ovasi mo oli kam stap kontinu long hem long Vanuatu mo sam oli tekem ova 20 taem blong injeksen.

“Age blong olketa patient we oli stap kam luk mi i stat long 20 kasem 50 yia olsem.”

Wan sos i talem se hemi bin stap yusum wan type blong penis pump sins 2007 from hemi luk se i mekem praevaet pat blong hem i bigwan.

Hemi talem se long 2018 mo 2019, hemi yusum bakeken.

Sos ia i talem se hemi bin luksave se i nogud mo hemi stopem.

Dr Leona i apil long ol seasonal wokman ovasi blong oli no abusum olketa wetem ol kaen prodak olsem from behaed i kat ol efek blong hem.

“Olsem tabu tok i talem oltaem se yumi tritim bodi blong yumi olsem temple blong Papa God,” Dr Leona i talem.

“Ol man mo ol woman oli mas lukaotem gud bodi ia, blong taem oli kambak oli stap sef mo ko luk ol famili.

“Mi nokat eni evidens blong talem se  i kat wan ples long Port Vila we oli stap tekem injeksen ia long hem mbe mi kasem ol stori we oli talem long mi se i kat difren pipol we oli kivim injeksen blong silicon long town.”

Surgeon Leona i talem se tri-aot-long fo man i ko long hospital long wan wik wetem problem long praevaet pat blong olketa.

“Onli samting we yumi save helpem olketa long hem, hemi blong mekem operation,” hemi talem.

“Operation ia hemi blong traem blong putum bak penis mo scrotum i kambak long nomol.

“Bigfala operation we mi bin mekem long wan patient hemi abaot fo haoa mo mi mekem long tri steij we i minim se hemi mas ko tru long tri difren operation.”

Long las yia, Dr Leona i lukim 65 patient wetem problem blong silicon injeksen.

“Hemia hemi olketa pipol we mi luk olketa nomo,” hemi talem.

“Mbe mi nosave namba blong ol pipol we oli stap tekem silicon injeksen ia.

“Wan samting we yumi nid blong save se injeksen blong silicon ia i no rili afektem prodaksen blong sperm.”

Dr Richard Leona hemi onli surgeon long Vanuatu we i stap karemaot ol operation blong silicon injeksen.

 

(Visited 2742 times, 3 visits today)

About The Author

You might be interested in