Silicone injeksen problem i inkris

Silicone injeksen problem long ol man i ko hed blong inkris.

Hemi wan wari long Onli surgeon Dokta blong Urologist long kaontri from ol silicone komplikesen kes we hemi luk long yia ia hemi ova 60.

Nomata long plante toksave abaot silikon injeksen sam yia i pas, Dr Richard Leona, onli dokta we i lukluk long eria blong rod blong pispis mo kidney, i talem se hemi ko hed blong luk 3-4 sikman wan dei from private pat i solap.

Dr Leona i talem se Vanuatu i mas strik long ol yus blong sex material from i afektem famili laef.

“Kavman i nidim wan regulation blong stopem silicone mo tu wan regulation blong kamaot long kava blong stopem ol kaen yus blong hem outsaed long hospital fasiliti,” Dr Leona i talem.]

“Komplikesen i minim se private pat i bigwan mo solap we i involvem ol scrotum. Be mein wan nao hemi afektem sexual laef blong oli nomo save silip wetem ol patna. Mo nara wan taem i solap i kat ol sore. Ol sore i kerap long private body mo i neva heal afta hemi infekted. Naoia i nokat ded yet be i save hapen sapos oli infeksen ia yumi nomo save kontrolem.

“Mo sapos i nidim wan act, i mas kat wan from kavman i mas adresem isu ia kwiktaem.”

Naoia i kat 15 pipol i stap wet blong ko tru long operesen long private pat blong olgeta.

“Ol kes ia i kasem ol man we oli kat 80 yia; so age i stat long twenties kasem 80,” Dr Leona i talemaot.

Hemi fani be Dr Leona i talem se ol kes ia i no kamaot nomo long Efate, plante oli travel i kam long Vila blong ko long operesen.

“Veri interesting se ol kes ia i kamaot long evri kona blong Vanuatu; ol pipol ia i kam long ol bush blong Tanna, Pentecost, Santo, Malekula, yu nemem, ol pipol long kavman, private sekta mo ol seasonal wokman i involv,” Dr Leona i talem.

“Hemi kostem olgeta tu from oli spendem vatu blong kam Vila. Mo taem i kat plante operesen bae oli mas wet mo hemia oli spend from oli liv long town.

“So olgeta we oli apu, olgeta we oli mared mo olgeta we oli yang oli stap involve long rabis aktiviti ia from plante oli luk laef blong ovasi mo oli wantem folem. Sam oli kat problem wetem woman blong olgeta long haos mo oli wantem pat long hem.”

I nogat evidens be Dr Leona i talem se i kat sam aktiviti blong injeksen.

“Silicon hemi wan material we hemi no sapos blong stap insaed long bodi blong yumi ol man o ol boy, from taem yu putum wan foreign samting i ko insaed long bodi, bodi i react long hem from hemi no akseptem mo hemi kosem tisu reaction mo i mekem penis i solap mo i bigwan mo i kasem steij we man i nomo save werem trauses.

“Mo hemia nao hao bigwan hemi save gro mo i afektem tu rod blong pispis.”

Long wan pre-depature briefing blong ol seasonal wokman sam taem i pas, ol Customs ofisa i bin mekem wan awarenes mo talem se anda long Customs regulation 113 blong 2014, ol item olsem penis pump i no alao blong kam insaed long kaontri, anles wan wokman i karem wan pepa long doctor blong talem se bodi blong hem i nomo save wok gud mo hemi nidim penis pump.

Customs i askem strong ol seasonal wokman blong stop tekem ol penis pump i kam long kaontri from hemi akensem loa.

Dr Leona i talem se, “Taem oli man ia oli kat problem wetem injeksen blong silicone ia, mo oli kam luk mi, i minim se oli nosave silip wetem waef o kelfren blong olgeta blong sam taem.”

Hemi talem se mo hemia i afektem relationsip blong olgeta tu from bae oli nogat sexual relationshp mo bae hemi had ia.

“Even ol seasonal wokman oli kasem injeksen ia ovasi mo oli kam stap kontinu long hem long Vanuatu mo sam oli tekem ova 20 taem blong injeksen. ”

Dr Leona i talem se hemi stap trenem wan yang surgeon blong helpem hem.

Hemi talem se problem ia i hapen bigwan nomo long ol man mo i no ol woman.

“Onli samting we yumi save helpem olgeta long hem, hemi blong mekem operasen,” Dr Leona i talem.

“Operasen ia hemi blong traem blong putum bak penis mo scrotum i kambak long nomol. Wan samting we yumi nid blong save se injeksen blong silicone ia i no rili afektem prodaksen blong sperm.

“Olsem tabu tok i talem oltaem se yumi tritim bodi blong yumi olsem temple blong Papa God,” Dr Leona i talem.

“Ol man mo ol woman oli mas lukaotem gud bodi ia we hemi temple blong Papa God.”

Long 2019, fes silicone operation we Dr Leona i wok long hem i tekem 4 haoa.

 

(Visited 3765 times, 2 visits today)

About The Author

You might be interested in