Sinopharm i no yus long Australia

Australia i no akseptem blong ol seasonal wokman i tekem stik blong Sinopharm.

Labour Dipatmen i konfemem afta long konsaltesen wetem Kavman blong Australia.

Commissioner blong Labour, Murielle Metsan Meltenoven, i talem se Australia i no apruvum yus blong sinopharm vaccine long kaontri blong hem mbe hemi alaoem blong ol wokman i tekem nomo vaccine blong Astrazeneca nomo.

Hemi talem se sinopharm vaccine oli no apruvum blong yusum long Australia.

“Mi askem ol seasonal wokman we oli wantem stap ko long Australia blong mas tinktink gud bifo travel,” Mrs Meltenoven i talem.

“Sapos ol seasonal wokman oli tekem sinopharm vaccine finis bae oli mas ko tru long sam nara vaccine bakeken taem oli kasem Australia.”

Ministry blong Health i talem se oli bin isuem wan memo finis blong stopem olgeta wokman ia blong no tekem COVID vaccine fastaem.

Sereana Natuman, Consultant long Vila Central Hospital, i talem se ol i nokat enaf stadi yet blong soem se sapos wan persen i tekem fes dos long difren vaccine, oli save tekem seken dos blong nara wan tu.

Hemi talem se hemia nao i mekem se oli stopem ol seasonal wokman blong no tekem vaccine fastaem.

“Australia i yusum ol COVID vaccine olsem Johnson & Johnson, Pfizer mo Astrazeneca long ol pipol long age 60 i ko antap,” Dr Sereana Natuman i talem.

Commissioner Meltenoven i kontinu blong talem se i moa gud tu blong ol seasonal wokman we oli stap long Australia mo New Zealand blong karem COVID vaccine nomo long tufala kaontri we oli stap long hem.

 

 

(Visited 951 times, 1 visits today)

About The Author

You might be interested in