Smol boy i stap long tritmen-VCH

Pikinini we i kasem kill long bell blong hem long Not Ambrym i stap long Vila Central Hospital.

Director blong ship HELPR 1, Dr Basil Leodoro i konfemem long VBTC Nius.

Dr Leodoro i talem se hemi glad we oli save help blong wan jata flaet blong Air Taxi i save tekem six yia old boy ia long Craig Cove, West Ambrym tete moning.

“Hemi wan smol pikinini we hemi pleple wetem knife, knife ating i stap long poket blong trauses blong hem. Mo taem oli stap pleiplei hemi klis mo mestem mo knife hemi stikim bell blong hem. Hole i ko insaed long bell mo i mekem se hemi kasem ol serious kil mo hemi mas muv i kam long Port Vila blong surgical tim oli save jekem hem mo tekem hem i ko long theatre,” Dr Leodoro i talem.

“Ol surgeon oli mas riperem hole we i stap long bell blong hem. Semtaem jekem ol nara strakja insaed long bodi blong mekem sua se knife i no damejem mo fixim hole we knife i mekem.

“Mifala i bin kasem wan rikwes blong help i kam long Nurse Pratisioner blong yumi, Victa we hemi stap wok long Not Ambrym folem kondak we mifala i bin kat wetem hem; Mi glad se hemi bin ripotem kes ia mo from hemi wan surgikol had kes. Mo communication hemi wan impoten samting long yumi long ol aelan.

“Mifala i no bin able blong help from ship i stap longwe long Ambrym so mifala i wok wetem Ministry blong Health blong karem sapot blong save sendem wan Air Taxi flaet i pikimap pikinini ia long Craig Cove afta we Nurse Victa i bin lukaotem hem long naet mo putum hem long bot blong ko long Craig Cove mo long hand blong ol ofisa blong Promedical long airport.

Dr Leodoro i askem ol mama mo Papa blong no letem ol pikinini i pleple wetem ol sharp objek olsem knife from oli save givim kill long olgeta o ol nara pikinini.