Low namba blong Drivers permit i kolek

Ova 400 Drivers permit i kolek sins October kasem Decemba 2022 long Efate.

Namba ia, Chief Executive Ofisa blong Public Land Transport Authority, Reginald Tabi i talem se hemi smol tumas from oli isuem aot 1000-2000 drivers permit.

Hemi talem se ova VT30 million i kolek olsem revenue blong permit evri yia.

Mr Tabi i talem se sapos ol pipol i pem gud permit bae revenu i save kasem VT50-60 million.

“So 400 hemi smol namba we yumi karem mo i likeli se ova 400 olsem ia bambae oli kam so oli mas wan fi blong VT5000 we i mekem se VT7000,” Mr Tabi i talem.

“Deitline hemi long Decemba 31 vinis we hemi expiry deit blong evri permit blong draeva. ”

Mr Tabi i talem se oli kolektem ova 100 vehicle permit.

“Taem blong inspeksen blong Public Works i stat long manis Novemba 2022 mo bambae hemi stop long March 31 long yia ia,” Mr Tabi i talemaot.

“Hemia hemi wan cut off deit mo hemi semak nomo sapos eni we i kam afta long deit ia bambae hemi pem wan leit fi blong VT5000 mo total mani we bae hemi pem bae hemi VT15,000.

“Sins Novemba kasem naoia yumi renew ova 100 nomo; Might inspeksen i muv i ko long Novemba 2022 we i sud stap long Octoba so hemia nao plante oli komplen. Hemi taem yumi save se yumi no ronron kasem las minit, yu mas ko mekem apointmen blong oli mekem deit we bae yu ko pasem trak. Evri trak we i yusum pablik rod i mas pas long Road Worthy Inspeksen.”

Mr Tabi i talem se permit hemi blong ol Public Transpot nomo.

Hemi talem se eni trak we i provaedem seves mo i jajem vatu long ol man i mas pem permit.

“I kat fulap long yumi long Efate, mo ol nara aelan i no stap renewem permit mo oli stap seves haed,” Mr Tabi i talemaot.

Hemi talem se hemi wan wok we bae oli wok blong impruvum blong givim faen long ol man we oli no stap folem loa.

“Yumi kat ol staff long evri provins mo i nid blong yumi wok tugeta wetem ol Polis blong save holem taet ol trak,” Mr Tabi i talem.

“Ol faen i stat long VT5000-20,000. Mbe i kat ol smol faen we sapos yu totalem ap hemia bae i save kasem VT50,000 o moa.”

Mr Tabi i talem se bae oli strik naoia long hao oli stap givim permit long ol draeva.

“Hemia i minim se ol draeva i mas dress ap gud, ol bus i stap long gudfala kondisen bifo oli givim aot permit,” Mr Tabi i talemaot.

“Taem owna i kam blong tekem permit, hemi mas mekem sua se hemi kam wetem bus o trak blong yumi luk. Sapos hemi no mitim criteria bae yumi nosave givim aot permit.”

(Visited 347 times, 1 visits today)

About The Author

You might be interested in