Smol namba blong pikinini i daonem risk blong cervical cancer

Vanuatu Family Health Association i talem se ol mama i save bonem araon fo pikinini nomo blong daonem risk blong olgeta blong kasem cervical cancer.

Nurse Jerol Sakita we hemi injaj long screening blong cervical cancer, long Vanuatu Family Health Association, i talem se ol woman i alao nomo blong save bonem tri kasem fo pikinini.

Nurse Sakita i talem se ol pikinini i kam tru long rod blong basket blong pikinini mo taem hem i bisi tumas, i save kasem infeksen mo kat wan bebet we i save divelop i kam kansa.

“Kalja blong Vanuatu i enkarejem blong ol mama i save bonem plante pikinini mbe hem ia i wan denja long laef blong wan mama,” Mrs Sakita i talem.

Hem i advisem ol woman blong mas klinim gud bodi blong olgeta oltaem mo no mas smoke.

“Yumi kat 40 yia long yia ia mo hemi taem ol woman i jenisim ol tinktink blong olketa mo stat blong klinim gud ol bodi blong olketa.”

Hem i talem se taem wan woman i luk sikmun mo kat sex hemi mas swim mo klinim gud hem oltaem.

Mrs Sakita i talem se taem i gat sik long cervix, bae bel blong woman i so oltaem, hemi taet oltaem mo nokat pawa. Hem i wokbaot i filim ol leg blong hem i taet, hed i wantem raon mo bel i fulap oltaem mo no wantem kakae gud.

“Sistem blong bonem bebe long ol difren ples mo i no long stret ples long hospital, i mas stop tu from hemi no helti.”

John Harry, wan memba blong Ready for wok long Youth Challenge Vanuatu, i talem se kalja blong Vanuatu i wan bigfala baria we i blokem ol pipol blong no tokbaot ol impoten helt isiu ia.

Mr Harry i talem se tru long wan reprodaktif helt woksop we hem i stap ko tru long hem naoia long Port Vila i helpem hem blong andastanem se hem impoten tumas blong mas tokbaot reprodaktif helt mo andastanem.

Nurse Sakita i talem se yanges age we i ded from cervical cancer long Vanuatu hemi wan gel blong 19 yia we i still stap long tinej blong hem. Hem i lusum laef blong hem long las yia.

(Visited 53 times, 1 visits today)

About The Author

You might be interested in