Solwota blong Feiawa Park i sef blong swim

Dipatmen blong Water Resources i karem aot tabu long solwota long Chantillys Hotel kasem mein market long Port Vila folem ol test we i soem se i sef blong pipol i swim long hem.

Director blong Dipatmen blong Water Resources, Erickson Sammy, i talem se hemia folem ol test we dipatmen i stap kondaktem long solwora long seafront mo i soem se naoia solwota ia i kam klia long bacteria.

Hemi talem se wan private lab tu long town i stap mekem ol tes long solwota long eria ia mo risal i soem se i klin.

Kavman tru long Dipatmen blong Water Resources i putum tabu ia blong no swim long 2019 folem denjeres level blong bacteria, folem ol bigfala amaon blong waste wota blong toilet blong ol bisnis haos long town.

Mr Sammy i talem se risal blong ol test ia i soem se solwota i klin lelbet kompea long 2019.

“Risal we i kamaot long ol tes i impruv bigwan we i minim se solwota i klin mo hemia nao National Water Resource Advisory Komiti i mit long las manis mo mekem disisen blong karemaot tabu long eria ia,” Mr Sammy i talem.

“Mi wantem advaesem se eria ia i klia blong pipol i swim long hem mbe no alao blong huk long ples ia from ol fish long eria ia oli bin kakae ol doti.

“Eria blong the Sebel Vanuatu Hotel kasem gavman wharf mo Chantillys Hotel kasem Tebakor eria, ol pipol i stil no alao blong swim yet long hem folem level blong doti bateria we i stap long hem yet.

“Yumi mas save se bacteria we i stap long solwota long ol eria ia hemi kamaot long sisit blong ol man mo hemi no sef.”

Mr Sammy i talem se solwota long eria blong Chantillys Hotel kasem mein market long Port Vila i klin lelbet from sam bisnis haos long town i mekem aksen blong impruvum ol system blong toilet mo wota blong olgeta.

“Mbe bae yumi stil isuem ol direksen notis mo givim ol faen folem ol bisnis haos we ol doti wota blong toilet system i stil stap ko long solwota,” Mr Sammy i talem.

“Yumi no talem toilet system nomo mbe ol doti wota we i kamaot long ol ples blong swim, ol kitchen sink mo tap.

“Bae tim blong Dipatmen blong Water Resources i kontinu blong lukluk moa long ol eria blong mekem se i nomo kat ol bateria ia i ko long eria blong town ia.

“Hemia from ol doti wota blong ol bisnis haos i stil save ko.

“Yumi wok wetem Port Vila City Council blong kivim ol direksen notis long ol bisnis haos we oli nid blong impruvum ol wota mo toilet system.”

Lord Mayor blong Port Vila City Council, Eric Puyo Festa, tugeta wetem Director blong Water Resources karem aot tabu ia.