South Santo One Area Council i openem niu ofis

Ol komuniti long South Santo Area One Council i stat blong kasem kavman seves.

Long satete, South Santo Area One Council i openem wan niu council ofis long Tasmalum komuniti we bae i provaedem moa kavman seves i ko long eria kaonsel.

Niufala bilding ia Deputy Prime Minista mo Minista blong Internal Affairs, Alatoi Ismael Kalsakau i openem.

Deputy Prime Minister Kalsakau i aknolejem ol jif blong Tasmalum komuniti ples we niufala bilding i stap long hem mo South Santo Area One Council blong provaedem spes blong graon blong kaonsel haos i stap long hem.

Hemi talem se hemia i minim bigfala samting long kavman blong Vanuatu.

Minister Kalsakau i talem se ol namele lif long Vanuatu Flag i minim pis mo i no rao rao.

“Wan resen from wanem kavman i no kam long yu hemi from yu no wantem patisipet wetem hem. Yu mekem graon spes, kavman bae i kam stret mo help developem graon blong yu,” Mr Kalsakau i talem.

Hemi talem se kaonsel haos i bigwan from i soem wan samting.

“Bae i kat moa kavman seves i enterem kaonsel haos ia olsem agrikalja seves mo trade.”

Mr Kalsakau i talem se ol pipol blong i tekem ownasip long ril mining blong decentralization.

Hemi aknolejem Sanma Provincial Government Council blong bilding ia i vinis long taem.

Hemi talem se hemia i wan exempol blong ol nara eria kaonsel mo lokol otoriti.

South Santo Area One Council ofis i bilt mo vinis long tri manis. Bilding ia i posibol tru long jenerol sapot blong ol nara lokol otoriti raon long kaontri.

Hemi talem tankiu long sapot blong ol lokol otoriti.

Hemi talem se bilding ia i soem se kavman i stap wetem pipol.

Long Sanma dei selebresen, Sanma Provincial Government President, Malmal Langi Tavue, i bin anaosem seves blong National Bank blong Vanuatu we bae i set ap long ol branj long South Santo Area One ofis mo Pasific Petroleum blong setem ap wan fuel station.

Tufala entiti ia bae i setem ap seves long Belvus long Bigbay Coast Eria Council long not blong Santo aelan.

President Tavue i talem se i kat ol impoten seves we ol pipol long rimot santo espeseli long saotwest, west mo notwest Santo.

 

(Visited 116 times, 1 visits today)

About The Author

You might be interested in