Staff terminate-Luganville Municipal

Twenty- one staff long Luganville Municipal Council i terminate from oli no folem stret proses blong rikruit.

Mayor blong Luganville long Santo, Allan Awa i talem se ol staff ia oli kam wok taem council i stap long saspensen.

Mr Awa i talem se Council i terminatem contract mo askem olgeta blong wet kasem taem oli advertisem bakegen ol position ia bifo oli save aplae.

“Folem nomo i kat pat long seksen Cap 126 long seksen 22 hemi tokbaot(Powers to engage staff). Ol pawa ia i givim pawa ia long council o administresen blong engejem ol staff long temporary bases,” Mr Awa i talemaot.

“Nao hemi save kambak blong folem proses blong kam wan permanent staff folem ol rikwamen we hemi kat. Council nao i lukluk blong givim blessing.

“Rikruitmen ia we Clerk i bin mekem hem foldaon anda long pat five blong Municipal Act, CAP 126, section 22, we i kivim pawa blong save engagem staff long temporarily bases(smol taem).”

Administration blong council we clerk i lidim i talem se bai i no mekem eni komen.

Council i mekem disisen ia long December mo biliv se wanem we oli mekem bai hemi setem wei blong folem stret proses blong eni futja rikwamen.