Stimulus package i kansel

2,000 bisnis we oli aplae from stimulus package long 2022 bai oli nomo save karem mani blong olgeta.

Minista blong Finance, John Salong i kanselem evri peimen i ko long ol bisnis folem cyber attack long kavman netwok we i mekem se oli lusum evri rikod we oli kat.

Minista Salong hemi talem se bai hemi no posibol blong oli putum bak.

“Aot long cyber attack ia, wan app we oli bin stap yusum blong prosesem long ol aplikesen ia i bin aot; I minim se yumi nosave hu ia ol 6000 aplikens we i bin proses. Yumi nosave se aot long 6000 ia wia olgeta nao 4000 we yumi pem mo hu long olgeta 2000 we oli no karem mani yet,” Minista Salong i talemaot.

“So hemi kam wan bigfala problem long konstraktem bak ol rikod. So sapos yu no karem ating bae yu nomo save tekem mani ia.”

Wan Komuniti Lida long North Efate hemi talem se oli no glad long disisen blong kavman blong kanselem ol peimen.

John Graham, hemi talem se disisen ia i no fair from oli promes blong tekem sapot ia.

“Eria secretary hemi ko raon blong askem mifala blong pem laesens; Mo mifala i faithful blong pem mo long taem blong COVID hemi talem se kavman bae i pem stimulus package long mifala,’ Mr Graham i talem.

“Hemi no fea nating. Mi ko long Finans oli se pakej i klos, from wanem i klos?

Minista Salong hemi talem se hemi no necessary blong pem out ol stimulus ia from bisnis activiti hemi kam bak normal.

“Olsem naoia bisnis hemi nomol; Nomoli yumi lukluk long Employment Support Program wetem ol nara stimulus package ia i bin hapen from ol bisnis i nogat,” Minista Salong i talemaot.

“Aktiviti olsem Tourism i nogat mbe naoia cruise ship i stat blong kambak. Mo boda i open long July 2022 vinis.

Minista Salong i talem se oli kanselem package ia mbe i kat ol eria we kavman i putum mani i ko long hem.

“Olsem special COVID banking fasiliti we i availabol long pipol hemia long Bred Bank mo putum VT600 million i ko long Vanuatu Rural Development Bank,” Minista Salong i talem.

VBTC Nius tim i traem blong karem wan komen long Chamba blong Commerce mbe hemi no posibol.

 

 

(Visited 317 times, 1 visits today)

About The Author

You might be interested in