Strict waj long yus blong ol kavman trak

Fleet Management Unit i wonem ol wokman blong Kavman blong no mis-yusum ol Kavman trak long ol raning we hemi no nid long taem blong COVID-19 pandemic.

Long 2019,  kavman i bin kat wan budget blong VT 94 million blong spendem long fuel mbe long en blong 2019 i luk kavman i bin spendem ova long mani ia mo i kasem VT 114 million.

Acting Secretary blong Public Service Commission, James Melteres, i talem se kavman i stap spendem bigfala mani tumas long fuel blong ol kavman trak ia.

Hemi talem se from bigfala amaon blong mani ia, unit risponsibol bae i aplaem ol strict rul long yia ia.

“Extra spend blong fuel ia long 2019, i no klia yet kasem tete,” Mr Melteres i talem.

“Mbe yia ia wetem impak blong COVID-19, yumi stap aplaem ol strict rul olsem, ol wokman blong kavman i no alao blong yusum trak afta long haoa blong wok,” Mr Melteres i talem.

“Ol wokman i no alao blong yusum trak long wiken mo hemia bae yumi putum sam kondisen we hemi aplae long hem.

“Bae mi givim wan exempol, samtaem yumi yusum ol kavman trak ia blong ko long ol karen o solwota, yumi pikim ap pikinini long skul blong ko long haos mo hemia i no folem rul we i aplae anda long komiti blong Fleet Management.”

Mr Melteres i talem se unit blong Fleet Management i monitarem nomo ol kavman trak blong Public Service.

“Mbe ol G trak blong ol minista mo cabinet blong hem i stap anda long olgeta Ministry nomo blong kavman,” hemi talem.

“Ol narafala kavman trak we oli yusum public mani hemi olgeta RV, 4VE, SLO, OPP, mbe ol truck ia tu fleet management unit i stap wok yet blong save monitorem.”

 

 

(Visited 591 times, 1 visits today)

About The Author

You might be interested in