Strong inlan win woning

Weta Ofis i wonem pipol blong lukaot long ol flying objek olsem ol dry tri branch folem strong inland win we i stap long kaontri.

Vanuatu Meteorology mo Geo-Hazards Dipatmen i talem se wan hae presa system long Tasman sea; eria bitwin Australia, New Caledonia, mo New Zealand i kosem strong inland win ia.

Ellen Luke, Duty Forecaster long Meteo Dipatmen, i talem long VBTC Nius tete moning se, hae presa ia i stap ova long Norfolk aelan tete moning mo from i kat tumas tide presa gradien; presa line i stap tuketa mo hemia ia nao win i kerap mo inkrisim spid blong hem.

Hemi talem se pipol i mas lisen long ol advaes we Meteo i kivim.

“Strong inland win ia hemi stap long 22-28 knots,” Ms Luke i talem.

“Mifala i putum aot tu strong marine woning long solwota; ol marina oli mas tekem kea taem oli ko aot long solwota.

“Ol wave blong solwota i save stap long 2.5 kasem 3 mita mo win i blo long wan saot east direksen wetem 21 kasem 30 knots.”

Duty Forecaster, Ms Luke, i talem se strong inland win long kaontri i save ko daon samtaem tete.

Mbe hemi talem se woning blong solwota bae i save stap kasem wiken.

Meteo Ofis i talem se weta i save kam gud bakeken sapos hae presa system ia i muv aot.