Strong intraksen blong ol pablik servant

Pablik Seves Komisen i isium wan strong instraksen long evri wokman blong hem blong ko karem stik meresin blong COVID.

Jeaman blong Pablic Seves Komisen, Simil Johnson, i talem se komisen i kivim tu wik blong evri wokman ia oli komplae.

Mr Johnson i talem se wei ia nomo bae i help protektem beautiful kaontri blong Vanuatu wetem ol pipol.

“Mi biliv se yumi ol lida long kaontri i kat duti blong mekem blong protektem populasen long wan taem blong pandemic ia, we yumi evri wan i andstanem se hemi hitim wol mo plante man oli lusum laef,” Mr Johnson i talem.

“Yumi long talem tankio long God from proteksen mbe i nid blong yumi act tu blong strengthenem ol proses mo prosija long taem naoia.

“Tankio kavman blong Vanuatu i kat ol proses i stap vinis mbe samtaem toktok mbe i nokat aksen ten ples ia nao hemi had, from sapos  sik ia i kam bae i spread rili fast.

“Intraksen ia hemi kam ifektiv stat long yestede(Tuesday wik ia) mo hemi kivim two wik long ol wokman blong kavman blong komplae long hem.”

Disisen ia i kamaot folem anaonsmen blong tu konfem COVID kes we Praem Minista, Honoroble Bob Loughman i mekem.

“I no hemia nomo be hemi blong mekem wokples blong kavman i sef long vaeres spos i gat komuniti aotbrek long fiuja,” Mr Johnson i talem.

“Afta long tu wik ia komisen bae i lukluk bak so i minim se sapos wan wokman i no tekem COVID vaccine yet hemi mas disaed blong ko tekem bifo hemi kam long wok.

“Yu we yu kat sam medikol isu, yu mas soem long pepa blong yu ko haos mo rest from yumi stem ap mesa blong protektem Vanuatu.

“Yumi evri wan i mas tekem risponsibiliti long kaontri we yumi lavem from sik ia hemi no rispektem eni man, weta yu wan jif, wan man blong jej o wan man blong lif.”

Pablik Relation Ofisa blong Kavman, Fred Vurobaravu, i talem long VBTC Nius se naoia we i stap, eniwan we i wantem ko long ofis blong Praem Minista i mas soem vacinesen kad bifo sekuriti i save alaoem hem blong ko insaed.

Mr Vurobaravu i talem se kavman i tekem serious naoia mo askem ol nara ofis blong tritim infomesen blong health ministry i siries tu blong sefem laef.

Hemi talem se oli no wantem tekem eni risk.