Strong protocol blong COVID-19 i aplae long repatriation

Kavman i tok hae long strong protocol blong COVID-19 se hemi efektiv mo i mekem se i kat wan kes blong COVID-19 nomo long Vanuatu.

Spokespersen blong COVID-19 mo semtaem Director General long Ministry blong Health, Russel Tamata i toktok ia long VBTC tokbak sho long tete.

Mr Tamata i talem se, no mata se Vanuatu i bin repatriatem aroan 5000 citizens long fes, seken mo nambatri repatriation mbe hemi kat wan kes nomo blong COVID-19.

Hemi talem se hemia i soem wan bigfala mesej se ol mesa blong COVID-19 we yumi kontaktem, hemi strong, efectiv mo gud tumas.”

Mr Tamata i talem se “Wan samting we mi wantem haelaetem long plesia se so far long region, Vanuatu nao i tekem bak plante citizen bitim ol nara kaontri, mo wan gudfala samting se fulap citizen i kambak mbe yumi kat wan COVID-19 kes nomo mo yumi able blong kontenem mo naoia yumi COVID-19 fri bakeken.”

“Hemia hemi wan samting we yumi sud hapi long hem,” hemi talem.

“Mo mi wantem talem olsem se Ministry blong Health wetem ol patna blong hem oli kontinu blong wok had blong mekem sua se yumi stap sef.”

Dr Philip Guyant long World Health Organisation long Vanuatu, i talem se i kat plante fakta we i kontribut blong mekem se ol repatriation i sakses.

“Wan olsem Mr Tamata i talem, yumi kat ol strong protocol blong COVID-19 i stap in ples sins long ol fes repatriation,” hemi talem.

“Wan nara tinktink hemi from olketa repatriation we oli kam long ol hae risk kaontri blong COVID-19 oli tes fastaem bifo kam insaed long Vanuatu.

“Vanuatu i kat hae namba blong ol seasonal wokman tu we oli ko wok long Australia mo New Zealand, mo oli tekem ol preventive mesa blong COVID-19 i serious taem oli stap ova sea mo taem oli kambak oli no infek wetem virus ia.

“Mo mi tink plante awareness blong virus ia i bin ko aot long kaontri tru long tokbak sho mo ol nara fom blong infomesen mekem se plante citizen i kambak, mbe yumi kat wan kes blong virus ia nomo.”

Spokespersen blong COVID-19, Mr Tamata, i talem se long namba tri repatriation ol protocol i aplae semak nomo long ol citizen we bae oli stap kambak.

“Kavman i bin askem mifala blong kam ap wetem sam nara protocol we blong akomodatem ol spesel grup blong pipol we blong kam insaed long kaontri, “ hemi talem.

“Mo tu blong lukluk long ol nara tinktink blong Tamtam bubble.

“Mifala i tekem i ko bifo National COVID-19 tasfos komiti vinis mbe Council blong ol Minista bae i mas apruvum mo yumi save tekem ap ol niufala tinktink ia.

“Namba tri repatriation ia bae yumi fokas blong tekem bak ol citizen blong yumi mbe lukluk plante nao blong tekem ol nara grup blong pipol we oli kam long kaontri from spesel resen.”

Mr Tamata i talem protocol blong ol spesel grup blong ol pipol ia bae oli disignem gud wetem ol strong rul.

Hemi talem se plan i bin stap blong namba tri repatriation i vinis long en blong March 2021.

“Mbe hemia i dipen from yumi save kat tinktink blong muvum,” Mr Tamata i talem.

Spokespersen blong COVID-19 long Vanuatu i talem tankiu bigwan long ol prea blong ol jej grup mo ol pipol blong Vanuatu long virus blong COVID-19.