Strong wind long saot aelan

Vanuatu Meteo i talem se ol aelan long saot bae oli expektem mo strong wind taem tropikol low i sta muv i ko long New Caledonia.

Meteo i talem se system ia i sud muv aot long nekis 12 haoa.

Sistem ia hemi kosem hevi flooding long ol eria blong Shefa mo Tafea. I kat olgeta ripot we i kamout long ol low lying eria.

Wan long ol eria we flood i hapen long hem hemi long Prima long Efate we plante taem pipol hemi mas muv aot long ol hom blong olgeta.

Wan mama long eria ia i talem se hemi flooding ia hemi folem river kolosap we hemi ovaflow folem rein long las tu dei.

Hemi talem se wanwan taem nomo oli stap lukim kaen flooding olsem ia.

I nokat eni ripot blong insiden we i hapen wetem wan man.

Long Tanoliu vilij, Not Efate, flood i tekem ples, wind i strong mo solwota i raf bigwan mo hemi wan bigfala wari from badge we i silip i stap long solwota.

Long Melematt, riva i rod bigwan tumas mo ol pipol we oli stap kolosap long riva, oli witnesem flood.

Plante man i bin kwestenem resen from wanem National Disaster Management Ofis i putum aot red alert mbe i no bin putum blue mo yellow alert.

Philip Meto, Provinsol Lieson Ofisa long National Disasta Management Ofis i talem long VBTC Tokbak sho long tete(Wednesday) se red alert ia i folem strong inland win mo hevi ren we i mekem se oli mas kamaot blong putum alert ia.

Mr Meto i talem se hemi ol niufala wei blong wok wetem National Weta Ofis. Mbe hemi talem tankiu long ol komen blong oli help impruvum seves ia.

Jerry Timothy, Ofisa injaj Tropikol Woning Senta, i talem se muvmen blong Tropikol Low ia i travel saot west i ko daon long New Caledonia mo system hemi kam mo klos wetem ol aelan long saot Vanuatu mo hemia nao kosem inlan strong wind mo hevi ren.

“Meterological blong hem long senta(Midel) i mas agri blong kam wan Saeklon,”Mr Timothy i talem.

“Mbe senta blong system ia i no mitim ol tul blong kam wan saeklon. Mbe long Not mo East blong sistem ia win i ko antap long 34 knots, so i kasem treshold blong ol gale win i mekem se yumi luk ol banana mo ol nara tri i foldaon.

“Fiji Meteo i no bin nemem sistem ia mbe taem yumi wet yumi luk se strong win ia i damejem ol kakae long garen mo ol tri.

“So Meteo Dipatmen i mas putum ol woning blong Tropikol Low we yumi vanuatu i stap insaed long hem.”

Acting Direkta blong Vanuatu Meteo Dipatmen, Allan Rarai, i rimaedem pipol se manis Novemba kasem April hemi saeklon sisen.

Mo pipol i mas pripea.

Meteo i advaes long hevi ren, strong win mo marine woning long solwota mo pipol i mas tekem kea.

(Visited 491 times, 1 visits today)

About The Author

You might be interested in