Strong woning-Kambak long God

Woning kol blong pipol i kambak long God folem plante daonfall blong bisnis, broken marriage, famili problem mo inkris yus blong blak magic.

Saot Malekula Mountain Witness i stap mekem kol naoia long Efate aelan.

“Sam long ol bigfala problem we mifala i stap fesem insaed long ol komuniti hemi ol broken marriage; Evridei wok plante mama oli kam stap krae from we oli harem nogud. Mo i no ol mama nomo ol papa tu oli stap kam blong serem arem nogud from mama i nomo save stap,” Pastor John Issac long Saot Malekula Mountain Witness i talemaot.

“Nara problem hemi yumi luk ol bisnis oli nosave gro, Long Malekula yumi faenem aot hemi problem blong kilim tinktink. Kilim bisnis o developmen we yumi save mekem. Plante bisnis ia taem oli stap i mekem se hom, komuniti o even jej i nosave develop from we i kat rabis fasin behaed we i mekem ol samting ia i nosave develop.

“Wokbaot blong grup ia mi luk God i stap mekem wok. From yumi mas kambak long motto we i talem se Long God yumi Stanap, tete long evri ples yu luk presens blong God i smol. Pipol i nomo ron blong harem tok blong God. Mbe presens blong God hemi namba wan ples we man i sud stap long hem from technology mo plante save i kam antap. Plante yangfala i strong hed be onli wei hemi yumi mas kambak long God mo spendem taem blong prea mo ridim toktok blong hem.”

Ova 100 pipol blong Elama session long Tanoliu vilij, Not West Efate we i inkludum ol studen mo tija blong Ulei Skul mo Lelepa Landing i rikomitim laef blong olgeta long Sunday wetem Bigman.

Evangelisim grup i kolektem 379 poison aot long 500 long Tanoliu.

“Yu we yu stap ia o yu no stap, yu wan black pussycat, yu stap wokbaot olbaot ia long naet from ol woman, yu karem i kam tete bifo bae pussycat ia i kakae yu, ” Elder Bernard Kampai i mekem kol.

“Yu we yu stap long plesia, yu stap planem wan wild taro mo evri taem ko katem branj blong hem mo putum blong ol mama i sikrasem olgeta, yu karem i kam. Yu wan mama yu stap insaed ia o aotsaed ia, God i talem long yu, yu spoilem tumas ol papa, yu karemaot ol klos blong olgeta long naet, yu karem blak stone blong yu i kam sapos no God bae i brekem hed blong yu long ston ia. Yu we yu stap long plesia yu kat wan language blong yu, language ia yu ko yusum long nasara blong yu blong kilim ol binis. Ko kolosap wan trak tajem nomo trak ia i nogud. Ol mein man ia karem ol samting i kam, God i nidim olgeta tete, Sapos no yu stap ko hom.

“Listen Gud, Saot West Bay mifala i berem man koko mifala i taet vinis. Buluk i vinis naoia yumi yusum tinfish nomo nao.

“Yu stap insaed ia o stap aotsaed sapos yu stap drink swim o kakae tekem wan protekta, wan man i bin givim long yu, mi wantem yu tekem i kam tete.” Elder Kampai i mekem kol.

“Yu tekem wan samting long solwota olsem tut blong nawita, starfish, sea cucumba o eni pis wud o ston, tekem i kam naoia. Yu kat eni tattoo yu tekem i kam from demon i luk vinis. Yu we yu stap insaed ia yu smoke o planem Marijuana, yu tekem i kam mo yu wan mama we yu stap drink kava yu kam tete.  Families God i stap kil vinis long Malekula.”

I kat wan total blong 15,876 poison long Malekula.

“Kasem yestete(Sunday) i kat 47 vinis we oli ded long Malekula, resen from we fulap long olgeta i no wantem admit olsem naoia we taem yumi stap lukim problem blong witcraft pratis hemi daonfol blong plante samting, Pastor Issac i talemaot.

“Ded blong olgeta ia i strange lelbet from God i strakem olgeta. Oli wokbaot o toktok nomo mbe oli foldaon mo ded. Plante long olgeta we oli ded ia oli ol yang pipol mo midel age.

“Mo mi biliv se God i setem ap grup ia blong kilim ap ful nation blong yumi save propa mo yumi save kat sakses. Mbe taem pipol i neglect o no wantem givim wanem we oli holem. God i stap toktok long olgeta

“Plante pipol long Mangaliliu mo Lelepa oli glad from yumi help tekem aot ol rabis fasin ia blong developmen i save hapen. “Saot Malekula Mountain Witness i statem wok blong hem long March mo grup ia i bin spendem plante dei mo naet antap long mountain blong kasem ol direksen long wanem nao God i wantem yumi blong mekem.

“Mo mi save talem olsem se hemi no isi blong yumi mekem wok ia. Hemi nidim plante dedication, sacrfice mo hemi wan stragol tu. Sins long March kasem naoia, ol wok we mifala i stap mekem, mifala i ko raon long Malekula blong visitim evri pipol.”

Pastor Issac i talem se i kat tu worship we oli stap mekem. Wan long moning mo wan long aftanun.

“Fes worship mifala i stap prea mo i worship mo afta long hem,  ol client i toktok wetem ol memba blong jej we oli kam; God tu i stap wokbaot blong karemaot plante samting we i stap holem taet ol developmen, i kosem plante hom blong broke, ol bisnis bae oli nosave gro mo plante samting ia taem mifala i wok long Malekula, mifala i stap tekem aot long olgeta pipol.

“Mo long aftanun worship, mifala i prea blong Papa God i fensem raon ol eria blong yumi mo hemia mifala i luk pawa blong God i wok. Mo plante pipol i kam blong sarenda laef mo oli fraet long God.”

“Fasting hemi wan long ol samting blong prea from pipol i kam blong admitim ol rong blong olgeta. Blong toktok wetem wan man blong sarenda hemi no isi ia. Wokbaot blong grup ia mi luk God i stap mekem wok. Mo yumi mas kambak long motto we i talem se long God yumi Stanap, tete long evri ples yu luk presens blong God i smol. Pipol i nomo ron blong harem tok blong God. Mbe presens blong God hemi namba wan ples we man i sud stap long hem from technology mo plante save i kam antap. Plante yangfala i strong hed be onli wei hemi yumi mas kambak long God mo spendem taem blong prea mo ridim toktok blong hem.

Clerk blong Not Efate Presbytery, Elder Kalmaire Kalmar i talem se mein pepes blong visit hemi blong pipol i luksave impotens blong God long evri situasen we oli fesem.

“Tete yumi biliv long ol eni kaen samting; yumi kat ol isu ale yumi handelem yumi wan wetem ol fasin blong yumi long Wol i mekem plante man i ronwe long presens blong God insaed long ol jej mo worshipem ol nara God.”

Mangaliliu oli rikodem 367 poisen mo Lelepa hemi 336.

I kat 25 memba long Saot Malekula Mountain Witness mo bae oli raonem ful Efate Presbytery blong Presbyterian jej kasem Novemba.