Sunae komuniti long Moso i benefit long yacht

Sunae kominiti long Moso aelan i kasem ova VT 4.3 million olsem paymen blong yacht we i bin wrek long taem blong Saeklon Pam long 2015.

Jeaman blong Sunae vilij Council blong olgeta Jif, Jif Jimmy Meameadola, i talem se amaon blong mani ia hemi blong pas six yia afta long saeklon Pam, we council i bin mekem disisen blong yacht owna blong Blue Gold i stap pem wan vatu evri manis i kambak long komuniti.

Hemi talem se hemia i mekem se Sunae komuniti i save riperem gud komuniti hall blong olgeta we saeklon Pam i bin damejem mo openem bak long jifs dei long eli manis March ia.

“Sunae vilij i kat blessing from mani ia i ko insaed long basket blong council,” Jif Meameadola i talem.

“Ol jif oli akri blong no yusum mani ia mbe kivim i ko long vilij council blong yusum blong bildim bak komuniti hall blong vilij.

“Taem Saeklon Pam i bin kilim yumi long Efate long 2015, i bin kosem tu disasta long Sunae vilij, wan hemi ol damej blong saeklon mo nara wan hemi man made disasta,” Jif Meameadola i talem.

“Long eli moning long March 16, ol pipol blong Sunae oli wake ap, oli sek long blong luk tu ship i wrek long solwota blong olgeta.

“Wan hemi patrol bot Tukoro mo narawan hemi yacht Blue Gold we i stap kasem tete.

“Wik ia, hemi six wik we Blue Gold i stap yet long solwota blong Sunae mbe hemi stap wetem blessing.”

Environment Committee ofisa blong Sunae Vilij, Abel Joel, i konfemem wetem VBTC Nius se i nokat eni environment impak we yacht ia i kosem long solwota blong olgeta.

“Sapos i kat wan impak long solwota, bae mi infomem Dipatmen blong Fisheries blong oli kam jekem.

“Long steij naoia, mifala ol pipol i nosave wanem taem bae yacht ia i aot, mbe mifala i talem tankiu from niufala bilding ia we ol pipol i save yusum olsem wan evacuation senta long taem blong disasta.”

Legal Ofisa long Ofis blong Maritime Regulator, Lloyd Fikiasi, i talem se oli stap wok long hao blong muvum aot yacht ia.

Hemi talem se anda long loa Maritime Regulator i nokat eni pawa blong karemaot wan yacht o ship we i wrek long wan eria long Vanuatu.

“Long situasen blong Blue Gold, owna hemi stil klem se ship hemi blong hem mbe yet hemi delei blong karemaot yacht blong hem long Moso,” Mr Fikiasi talem.

“Yumi stap wet blong aksem advaes long State Law Ofis blong save mekem wan aksen.

“Mo yia ia 2021, yumi mas mekem wan aksen blong karemaot.”

Mr Fikiasi i talem se oli save long dil we ol pipol blong Sunae vilij i kat wetem owna blong yacht ia.

“Yumi stap askem Sunae Jif Council blong kam tuketa, toktok mo kivim wan petition i kam long Kavman blong yumi save muvum aot ship ia ariap,” hemi talem.

“Yumi save se hemi no kosem eni damej long eria blong solwota ia mbe yumi askem komuniti blong no tekem advantej long mani we i kam insaed long komuniti mbe helpem kavman long ol wok fowod blong muvum aot yacht ia.”

Wan Jif long Sunae vilij, Kalmele Matuele, i talem se niufala komuniti hall ia bae ol jif i yusum tu blong mit long hem mo wet blong bildim niufala farea blong ol jif.

Ol pipol blong Sunae Vilij wetem ol grup blong Meameadola clan oli bin stap blong witnesem opening blong niufala hall ia mo graon break blong niu nakamal blong ol jif blong Sunae.