Tafea i nidim kwiktaem wan electoral ofisa

Tafea Provins i kol blong i kat wan Electoral ofisa long Tanna blong infomem mo priperem ol pipol long Provincial Eleksen long May.

Secretary General blong Tafea Provin, Joe Iautim, i talem se resen from deit blong voter registry blong Provincial election i en long tumoro, 31 March 2021 mbe ofisa we Electoral ofis i asaenem hem blong jekem ol dokumen blong ol pipol blong vot long Tanna i stap mekem plante wok yet blong jekem ol kad blong vot blong ol pipol.

“Wan aelan olsem Tanna we taim eleksen evri wan i wantem exercisem raet blong olgeta i nidim wan ful taem electoral ofisa,” Mr Iautim i talem.

“Resen mi talem olsem from long evri dei wok, ol electoral mo National Id kad i updeit.

“ Fulap pipol i travel longwe blong jekem ol dokumen ia.

“I nid blong kat wan permanent Electoral Ofisa i stap long Provins ful taem blong jekem ol kad blong vot blong ol pipol blong i stap apdaet oltaem.

“Long wik ia, ofisa ia i mas stap leit kasem haf pas 10 long naet blong mekem ol wok ia.”

Sam lokol i talem se Kavman i mas luksave nid ia kwiktaem mo sendem wan ofisa blong stap fultaem.

“Mifala i travel longwe, sam oli kam long East mo South Tanna, mifala i kam mifala i mas wet longtaem, sam oli angre from oli wet koko,” oli talem.

“Yumi mas mekem i fea long evri ples.”

Secretary General, Mr Iautim, i talem se provins i nokat pawa blong extendem deit blong voter registry we Electoral Commission i putum se i klos tumoro.

Ettiene Ravo, Deputy Director blong Civil Registry long Electoral Ofis, i talem se oli awea long ol konsen ia mo bae oli akt long hem.

“Mifala i bin advertisem post blong wan Electoral Ofisa blong Tafea mo i stap long proses blong rikruit,” Mr Ravo i talem.

“Ol aplikesen i kam in vinis mo mifala i shotlistim ol pipol ia.”

Mr Ravo i talem se nomoli deit blong voter registry blong Provincial Election i sud klos vinis mbe oli muvum i ko long en blong March.

“Anda long loa, yumi nomo save jensem deit ia we Electoral ofis i putum from i mas en six wik bifo eleksen i laps,” Mr Ravo i talem.

“I bin kat wan verification exercise i bin tekem ples long Tanna eli long manis ia, blong jekem ol kad blong vot blong ol pipol mo mi tink ol pipol ia bae oli oraet blong vot from bae mifala i sendem ol dokumen blong olgeta i kobak long Tanna bifo deit blong vot long 12 May.

“Long olgeta we taem i shot bae oli nosave vot nomo.”

Deit blong voter registry blong Provincial eleksen i en long 31 March 2020 long 5pm.

Ol provins we bae oli ko tru long eleksen hemi Penama, Malampa, Shefa mo Tafea

 

 

 

 

 

 

 

(Visited 185 times, 1 visits today)

About The Author

You might be interested in