Tanna Nekowiar Ceremony i kik off

Tanna Cultural Center i talem se Nekowiar Ceremony we i stat off tedei long aelan blong Tanna hem i blong unitem ol pipol.

Nekowiar Ceremony, hem i wan bigfala kastom seremoni we insaed long hem i gat ol difren kastom danis mo wan long ol danis ia hem i popular Toka Dance.

Wahe Jean Pascal, Ofisa long Tanna Cultural Center, i talem se hem i wan taem blong pis mo unity.

“Hem i blong unitem yumi wetem ol pig killing blong stopem ol raorao bitwin yumi,” Mr Pascal i talem.

“Bifo ol tribal war mo cannibalism i stap hapen mo ol tribe mo ol jif oli disaed blong mekem Nekowiar.”

Mr Pascal i talem se hem i taem tu we ol pipol i exchangem ol goods, kakae mo pig.

Hem i talem se Nekowiar hem i stap hapen long everi fo yia mo hem i bin stap hapen araon 200 yia nao.

Hem i talem se “Tedei moning, ol pipol i stap tekem pig i ko long nakamal finis mo oli stap priperem kakae vinis mbe danis i no hapen,” Mr Pascal i talem.

Hem i talem se event ia hem i open tedei mo bae i stap kasem Satedei.

Ol difren danis grup oli stap rihes raon long Tanna rere from seremoni ia.

Mr Pascal i talem se Toka Dance hem i no nem blong event ia, hem i wan danis nomo we i pat blong Nekowiar event ia mbe hem i no nem blong event olsem plante i stap talem mo confuse long hem.

Hem i talem se Napenapen Dance, wan spesel kastom danis we i tekem tugeta grup blong ol woman raon long Tanna bae i stat off long tumoro olsem fes danis blong event ia.

Mr Pascal i talem se long Thursday, hem i dei blong mekem laplap redi from Friday mo Saturday. Long taem ia tu ol difren kastom danis grup we oli stap danis raon long Tanna, oli muv i kam mo stap mekem ol las pefomens blong olgeta long ol nakamal kolosap bifo oli kam in long Saturday we hem i final dei blong seremoni.

Hem i talem se mo long Friday, Napenapen Dance blong ol woman bae i kohed stat long 6am kasem 6am long Saturday.

Hem i talem se mein aktifiti blong Nekowiar we pipol i no mas mestem janis blong wajem, hem i long Saturday eli moning.

Hem i talem se long taem ia nao we bae oli putum wan longfala feta we hem i simpolisem pis mo unity long hed blong wan man olsem wan jif.

Mr Pascal i klarifaem plante toktok we pipol i stap talem espeseli long sosol media we i talem se sam praktis olsem polygamy we hem i fasin blong gat moa long wan wife o husband long sem taem, i stap hapen tu long seremoni ia.

Mbe Mr Pascal i eksplenem se Nakowiar Ceremony hem i kam blong stopem ol fasin ia. I no fasin blong polygamy nomo be ol nara fasin olsem kilim man i ded mo plante moa we seremoni ia i kam blong stopem mo putum pis bitwin ol tribe.

“Yu no tekem Nekowiar olsem taem blong spolem laef blong wan nara man. Yu no tekem Nekowiar olsem wan advantage blong save ko stilim woman blong wan narafala man. Hem ia i tabu. I gat ol security blong nakamal we oli stap blong lukluk long eria ia,” hem i talem.

Hem i talem se plante pipol espeseli long Port Vila, i stap vinis blong wajem seremoni ia.

(Visited 575 times, 1 visits today)

About The Author

You might be interested in